நியூஸிலாந்துக்கு எதிரான 3-வது கிரிக்கெட் டெஸ்ட் போட்டியில் மேற்கு இந்தியத் தீவுகள் அணி வெற்றி பெற 462 ரன்கள் இலக்காக நிர்ணயிக்கப்பட்டுள்ளது.
நியூஸிலாந்தில் சுற்றுப்பயணம் செய்து டி20, ஒருநாள், டெஸ்ட் தொடர்களில் மேற்கு இந்தியத் தீவுகள் அணி விளையாடி வருகிறது. கிறைஸ்ட்சர்ச்சில் நடைபெற்ற முதல் டெஸ்ட் போட்டி டிராவில் முடிந்த நிலையில் வெலிங்டனில் நடந்த 2-வது டெஸ்ட் போட்டியில் நியூஸிலாந்து வெற்றி பெற்று தொடரில் 1-0 என்ற கணக்கில் முன்னிலையில் உள்ளது.
இந்நிலையில் 3-வது டெஸ்ட் போட்டி மவுண்ட் மவுங்கனுவில் தொடங்கியது. நியூஸிலாந்து முதல் இன்னிங்ஸில் 8 விக்கெட் இழப்புக்கு 575 ரன்கள் குவித்து டிக்ளேர் செய்தது. இதையடுத்து முதல் இன்னிங்ஸை விளையாடிய மேற்கு இந்தியத் தீவுகள் அணி 3-ம் நாள் ஆட்ட நேர இறுதியில் 6 விக்கெட் இழப்புக்கு 381 ரன்கள் எடுத்திருந்தது.
இந்நிலையில் நேற்று 4-ம் நாள் ஆட்டத்தை கவேம் ஹாட்ஜ் 109 ரன்களுடனும், ஆன்டர்சன் பிலிப் 12 ரன்களுடனும் தொடங்கினர். முதல் இன்னிங்ஸில் மேலும் 39 ரன்கள் சேர்ப்பதற்குள் மேற்கு இந்தியத் தீவுகள் அணி ஆட்டமிழந்தது. ஆன்டர்சன் பிலிப் 17 ரன்களும், ஷாய் ஹோப் 4 ரன்களும், ஜெய்டன் சீல்ஸ் 15 ரன்களும் எடுத்து ஆட்டமிழந்தனர்.
முதல் இன்னிங்ஸில் இரட்டைச் சதம் விளாசிய டேவிட் கான்வே 100 ரன்கள் குவித்து ஆட்டமிழந்தார். கேப்டன் டாம் லேதம் 130 பந்துகளில் 101 ரன்களை விளாசி அவுட்டானார். கேன் வில்லியம்சன் 40 ரன்களும், ரச்சின் ரவீந்திரா 46 ரன்களும் குவித்தனர். இதையடுத்து 462 ரன்கள் குவித்தால் வெற்றி என்ற இலக்குடன் 2-வது இன்னிங்ஸை மேற்கு இந்தியத் தீவுகள் அணி தொடங்கியது.
நேற்றைய ஆட்ட நேர இறுதியில் அந்த அணி 16 ஓவர்களில் விக்கெட் இழப்பின்றி 43 ரன்கள் எடுத்துள்ளது. ஜான் கேம்ப்பெல் 2, பிரண்டன் கிங் 37 ரன்கள் குவித்து களத்தில் உள்ளனர். வெற்றிக்கு இன்னும் 419 ரன்கள் தேவை என்ற நிலையில் இன்றைய கடைசி நாள் ஆட்டத்தை மேற்கு இந்தியத் தீவுகள் அணி தொடர்ந்து விளையாடவுள்ளது.
