செங்கல்பட்டு அருகே சாலைகளில் சுற்றித்திரியும் தெருநாய்களை பிடிக்க வேண்டும் என பொதுமக்கள் கோரிக்கை விடுத்துள்ளனர்.
செங்கல்பட்டு அருகே ஆலப்பாக்கம் ஊராட்சியில் உள்ள பீ.டி. நகர் பகுதியில் தெருநாய்களின் அட்டகாசம் நாளுக்கு நாள் அதிகரித்து வருவதால் பொதுமக்கள் பெரும் அச்சத்திற்கு உள்ளாகியுள்ளனர். இப்பகுதியில் சுமார் 300க்கும் மேற்பட்ட குடும்பங்கள் வசித்து வருகின்றன. அன்றாட வாழ்க்கைக்கு தேவையான அத்தியாவசியப் பணிகளுக்காக சாலைகளில் இறங்கும் மக்கள், குறிப்பாக குழந்தைகள், பெண்கள் மற்றும் முதியவர்கள் தெருநாய்களின் தொல்லையால் தொடர்ந்து பயந்தபடியே இருக்கின்றனர்.
சுற்றித்திரியும் தெருநாய்கள் வாகனங்களைப் பின்தொடர்ந்து ஓடுவது, மக்களை நோக்கி ஆக்ரோஷமாக குரைத்து பாய்வது போன்ற செயல்கள் அன்றாட நிகழ்வுகளாக மாறியுள்ளன. குறிப்பாக, சமீபத்தில் இப்பகுதியில் நடைபெற்ற ஒரு சம்பவம் பெரும் பரபரப்பை ஏற்படுத்தியது. ஓர் நாயை ஐந்து முதல் ஆறு தெருநாய்கள் சேர்ந்து கடித்து தாக்கிய காட்சி அப்பகுதி மக்களை அதிர்ச்சியில் ஆழ்த்தியது. அந்தக் காட்சியை நேரில் பார்த்த பலர், “தெருநாய்களின் எண்ணிக்கை மட்டுமல்ல, அவற்றின் ஆக்ரோஷமும் பல மடங்கு அதிகரித்துள்ளது. எந்த நேரத்தில் யாரைத் தாக்கும் என்ற பயத்தில் வாழ்கிறோம்” எனக் கவலை தெரிவித்தனர்.
பீ.டி. நகர் பகுதியில் உள்ள பள்ளிகளுக்கு செல்லும் குழந்தைகள், காலையில் பால் வாங்கச் செல்லும் பெண்கள், வேலைக்குச் செல்லும் இளைஞர்கள் என அனைத்துத் தரப்பினரும் இந்தப் பிரச்னையால் பாதிக்கப்படுகின்றனர். மாலை நேரங்களில் சாலைகளில் நடைப்பயிற்சி செய்யும் முதியவர்கள் கூட தங்கள் வழக்கத்தை மாற்ற வேண்டிய நிலைக்குத் தள்ளப்பட்டுள்ளனர். சிலர் கையில் கம்புகளுடன் செல்லும் அளவுக்கு நிலைமை மோசமடைந்துள்ளது. தெருநாய்கள் பெருகுவதற்கு உள்ளாட்சி அதிகாரிகள் போதிய நடவடிக்கை எடுக்காதது ஒரு முக்கிய காரணமாகக் கூறப்படுகிறது.
மக்கள் தொடர்ந்து புகார் அளித்தும் உரிய தீர்வு கிடைக்காததால், பொதுமக்கள் மத்தியில் அதிருப்தி அதிகரித்துள்ளது. “எங்கள் பாதுகாப்பு அரசின் பொறுப்பு. உடனடியாக தெருநாய்களைப் பிடித்து காப்புறை மையங்களுக்கு அனுப்பவோ அல்லது பிற பாதுகாப்பு நடவடிக்கைகளை மேற்கொள்ளவோ வேண்டும்” என அப்பகுதி மக்கள் கோரிக்கை விடுத்துள்ளனர். இப்பகுதியில் வாழும் மக்களின் அன்றாட வாழ்வு பாதிக்கப்படுவதைத் தடுக்கவும், சிறியவர்கள் முதல் பெரியவர்கள் வரை அனைவருக்கும் பாதுகாப்பான சூழலை உருவாக்கவும் சம்பந்தப்பட்ட அதிகாரிகள் உடனடியாக தலையிட்டு நடவடிக்கை எடுக்க வேண்டும் என்பது அனைத்து தரப்பினரின் எதிர்பார்ப்பாக உள்ளது.
