தமிழ்நாட்டின் நலன் காக்க, மதவெறி ஃபாசிசத்துக்கு எதிராக தொடர்ந்து களமாட வேண்டும் என தவெக தலைவர் விஜய்க்கு மனித நேய மக்கள் கட்சியின் தலைவர் பேராசிரியர் எம்.எச்.ஜவாஹிருல்லா கேட்டுக் கொண்டுள்ளார்.
அவர் விடுத்துள்ள அறிக்கை வருமாறு;-
தமிழக சட்டசபை தேர்தலில் அதிக இடங்களை வென்றுள்ள தமிழக வெற்றிக் கழகத் தலைவர். விஜய் அவர்களுக்கு மனமார்ந்த நல்வாழ்த்துகளை தெரிவித்துக் கொள்கிறேன்.
திராவிடம் மாடல் தி.மு.க. அரசு 2021 முதல் 2026 வரை மிகச் சிறப்பான நல்லாட்சியை மக்களுக்கு தந்தது என்பது மறக்க முடியாத உண்மை.
திமுக அரசின் திட்டங்கள் ஒவ்வொரு குடும்பத்தையும் தனி மனிதரையும் பல வழிகளில் சென்றடைந்து பயன் நல்கியுள்ளன.
உயர்கல்வியில் இந்தியாவின் முதல் இடத்தை தமிழ்நாடு அடைவதற்கும் தரமான பள்ளிக்கல்வியை ஏழை, எளிய மக்களின் பிள்ளைகள் பெறுவதற்கும் தி.மு.க. அரசு செயல்படுத்திய திட்டங்கள் காரணமாக இருந்தன.
தமிழ்நாட்டை இந்திய மாநிலங்களில் இரட்டை இலக்கப் பொருளாதார வளர்ச்சியில் முன்னேற்றியது திமுக ஆட்சி. ஒன்றிய அரசின் ஆவணங்களே அதற்கு சாட்சி
தமிழ்நாட்டின் மாநில உரிமைகளை பறிப்பதற்கும் பொருளாதாரத்தை நசுக்குவதற்கும் இந்தியை நம் மீது திணிப்பதற்கும் மத வெறி ஃபாசிசக் கூடாரமாக தமிழ்நாட்டை மாற்றுவதற்கும் ஒன்றிய பாஜக அரசு செய்த சூழ்ச்சிகளை முத்துவேல் கருணாநிதி ஸ்டாலின் எதிர்த்து நின்றார்.
ஒன்றிய பாஜக அரசின் ஓயாத இடையூறுகளை மீறியே தமிழ்நாட்டை வளர்ச்சிப் பாதையிலும் நாகரிக அரசியலிலும் அவர் வழி நடத்தி வந்தார் என்பது ஆணித்தனமான உண்மை
இப்போது தமிழ்நாட்டு மக்கள் தமிழக வெற்றிக் கழகத்திற்கு அதிக இடங்களில் வெற்றியை தந்துள்ளனர்.
ஃபாசிச கோட்பாடு கொண்ட பாஜகவை விஜய் தனது கொள்கை எதிரி என்று பிரகடனம் செய்துள்ளார். ஆயினும் தேர்தல் பரப்புரைகளிலோ மற்ற கூட்டங்களிலோ ஃபாசிச பாஜகவின் மதவெறி போக்கு குறித்து மௌனம் சாதித்து வந்த விஜய் இனியாவது மனந்திறக்க வேண்டும்.
மக்கள் நலன் பேணுவதிலும் மாநில உரிமைகளை காப்பதிலும் மதவெறி ஃபாசிச பாஜகவுக்கு அணுவளவும் பணிந்து விடாமல் உருட்டல் மிரட்டல்களுக்கெல்லாம் அஞ்சி விடாமல் மதச்சார்பற்ற சகோதரத்துவ சமாதான தமிழகச் சூழலை பேணிக்காக்க. விஜய் முன்னிருக்க வேண்டுமென இந்நேரத்தில் வலியுறுத்துகிறேன்.
தமிழக வெற்றிக் கழகம் தமிழக நலம் காக்கும் வகையில் ஃபாசிச பாஜகவை முறியடிக்கும் வகையில் தொடர்ந்து செயல்பட வாழ்த்துகிறேன் என அறிக்கையில் கூறியுள்ளார்.
