பொள்ளாச்சி அருகே விவசாயத் தோட்டத்தில் புகுந்த சிறுத்தை ஒன்று, அங்கிருந்த கன்றுக்குட்டியைக் கடித்துக் கொன்ற சம்பவம் அப்பகுதி விவசாயிகளிடையே பெரும் அதிர்ச்சியையும் அச்சத்தையும் ஏற்படுத்தியுள்ளது.
பொள்ளாச்சி அடுத்த அங்கலக்குறிச்சியைச் சேர்ந்த துரை என்பவருக்குச் சொந்தமான விவசாயத் தோட்டம் ஆழியார் புளியங்கண்டி பகுதியில் உள்ளது. இந்தத் தோட்டத்தில் புளியங்கண்டியைச் சேர்ந்த மைக்கேல் (50) என்பவர் தங்கி வேலை செய்து வருகிறார். இவர் விவசாயப் பணிகளுடன் சொந்தமாக ஆடு, மாடுகளையும் வளர்த்து வருகிறார்.
வழக்கம்போல் நேற்று மாலை கால்நடைகளைத் தோட்டத்தில் உள்ள பட்டியில் அடைத்து வைத்துவிட்டு மைக்கேல் வீட்டிற்குச் சென்றுள்ளார். இன்று காலை மீண்டும் தோட்டத்திற்கு வந்து பார்த்தபோது, பட்டியில் மாடு மட்டுமே இருந்துள்ளது; கன்றுக்குட்டியைக் காணவில்லை. இதனால் தேடிப் பார்த்தபோது, பட்டியில் இருந்து சுமார் 100 மீட்டர் தொலைவில் கன்றுக்குட்டி பாதியளவு விலங்கால் உண்ணப்பட்ட நிலையில் இறந்து கிடப்பதைக் கண்டு அவர் அதிர்ச்சியடைந்தார்.
இதுகுறித்து ஆழியார் வனத்துறையினருக்கு உடனடியாகத் தகவல் தெரிவிக்கப்பட்டது. சம்பவ இடத்திற்கு விரைந்து வந்த வனத்துறையினர் அப்பகுதியில் தீவிர ஆய்வு மேற்கொண்டனர். அப்போது அங்கு பதிவாகியிருந்த விலங்கின் காலடித்தடங்களை ஆய்வு செய்ததில், அது சிறுத்தையின் காலடித்தடங்கள் என்பது உறுதி செய்யப்பட்டது. சிறுத்தை தாக்கியதாலேயே கன்றுக்குட்டி உயிரிழந்தது அதிகாரப்பூர்வமாகத் தெரியவந்தது.
வனப்பகுதியையொட்டி உள்ள விளைநிலங்களுக்குள் யானை, சிறுத்தை உள்ளிட்ட வனவிலங்குகள் அடிக்கடி புகுந்து பயிர்களையும், கால்நடைகளையும் தொடர்ந்து சேதப்படுத்தி வருகின்றன. இதுகுறித்து பலமுறை வனத்துறையினரிடம் புகார் அளித்தும் நிரந்தர தீர்வு காணப்படவில்லை என விவசாயிகள் குற்றம் சாட்டுகின்றனர்.
புளியங்கண்டி கிராமம் அடர்ந்த வனப்பகுதிக்கு மிக அருகில் உள்ள குக்கிராமம் என்பதால், தற்பொழுது சிறுத்தை நடமாட்டம் காரணமாகக் குழந்தைகளை வீட்டை விட்டு வெளியே அனுப்பவே பெற்றோர் கடும் பீதியடைந்துள்ளனர்.
எனவே, தொடர்ந்து கால்நடைகளை வேட்டையாடி வரும் இந்தச் சிறுத்தையை வனத்துறையினர் உடனடியாகக் கூண்டு வைத்துப் பிடித்து, மனித நடமாட்டமில்லாத அடர்ந்த வனப்பகுதிக்குள் கொண்டு போய் விட வேண்டும் என கிராம மக்கள் அவசரமாக வலியுறுத்தியுள்ளனர்.
