தமிழக சட்டமன்றத் தேர்தலை முன்னிட்டு, நடிகர் விஜய் தலைமையிலான தமிழக வெற்றிக் கழகம் மற்றும் மனிதநேய ஜனநாயக கட்சி (மஜக) இடையே அதிகாரப்பூர்வமாக தேர்தல் கூட்டணி உறுதி செய்யப்பட்டுள்ளது. இக்கூட்டணியின் கீழ், மயிலாடுதுறை சட்டமன்றத் தொகுதி மனிதநேய ஜனநாயக கட்சிக்கு ஒதுக்கப்பட்டுள்ளது. நீண்ட ஆலோசனைக்குப் பிறகு, இத்தொகுதியில் தவெக கூட்டணியின் சார்பில் மஜக-வின் பொதுச்செயலாளர் ஹாரூன் ரஷீத் வேட்பாளராகக் களம் இறங்குவார் என்று அதிகாரப்பூர்வமாக அறிவிக்கப்பட்டுள்ளது.
இந்தத் தேர்தலில் தவெக-வின் அங்கீகரிக்கப்பட்ட ‘விசில்’ சின்னத்தில் ஹாரூன் ரஷீத் போட்டியிடுகிறார். தொகுதியில் செல்வாக்கு மிக்க வேட்பாளராகக் கருதப்படும் அவர், தவெக மற்றும் மஜக ஆகிய இரு கட்சிகளின் தொண்டர்களின் ஆதரவுடன் தீவிர தேர்தல் பிரச்சாரத்தை முன்னெடுக்கத் திட்டமிட்டுள்ளார். ஊழலற்ற நிர்வாகம் மற்றும் சமூக நீதி ஆகியவற்றை முதன்மைப்படுத்தி இந்த ‘மக்கள் கூட்டணி’ களம் காண்பதாக கட்சித் தலைமை தெரிவித்துள்ளது. மயிலாடுதுறை தொகுதியில் மஜக வேட்பாளரின் அறிவிப்பு, அந்தப் பகுதியின் தேர்தல் களத்தில் பெரும் எதிர்பார்ப்பை ஏற்படுத்தியுள்ளது.
