தமிழக அரசியல் வரலாற்றில் ஒரு புதிய சகாப்தத்தைப் படைக்கும் வகையில், தமிழக வெற்றிக் கழகத்தின் தலைவர் விஜய் தனது முதல் தேர்தலிலேயே பிரம்மாண்டமான வாக்குகளைக் குவித்து எம்.ஜி.ஆரின் சாதனையை முறியடித்துள்ளார். இன்று பிற்பகல் நிலவரப்படி, தவெக சுமார் 34.66% வாக்குகளைப் பெற்று முன்னிலையில் உள்ளது. கடந்த 1977-ம் ஆண்டு எம்.ஜி.ஆர் தனது அதிமுக கட்சி மூலம் சந்தித்த முதல் சட்டப்பேரவைத் தேர்தலில் 30.4% வாக்குகளைப்(95,260 வாக்குகள்) பெற்று ஆட்சியைக் கைப்பற்றினார். அந்த சதவீதத்தை தற்போது விஜய் முறியடித்திருப்பது, திரைத்துறையில் இருந்து அரசியலுக்கு வந்த ஹீரோக்களில் மிகச்சிறந்த தொடக்கத்தைப் பெற்றவராக அவரை மாற்றியுள்ளது.
வெற்றி விவரங்களைப் பொறுத்தவரை, பெரம்பூர் தொகுதியில் போட்டியிட்ட விஜய், தன்னை எதிர்த்துப் போட்டியிட்ட திமுக வேட்பாளர் ஆர்.டி.சேகரை விட சுமார் 44,000 வாக்குகள் வித்தியாசத்தில் அபார வெற்றி பெற்றுள்ளார். ஒரு நட்சத்திரத் தலைவர் என்ற பிம்பத்தைத் தாண்டி, அடிமட்டத் தொண்டர்களின் உழைப்பும் மக்கள் மாற்றத்தை விரும்பியதும் இந்த இமாலய வெற்றிக்குக் காரணமாகப் பார்க்கப்படுகிறது. இந்தத் தொகுதியில் அதிமுக கூட்டணியில் களம் கண்ட பாமக வேட்பாளர் திலகபாமா, தவெக மற்றும் திமுகவுக்கு ஈடுகொடுக்க முடியாமல் மூன்றாம் இடத்திற்குத் தள்ளப்பட்டது குறிப்பிடத்தக்கது.
தவெகவின் இந்த எழுச்சி திராவிடக் கட்சிகளின் கோட்டையாகக் கருதப்பட்ட பல இடங்களை அசைத்துப் பார்த்துள்ளது. குறிப்பாக, சென்னையில் உள்ள பல தொகுதிகளில் தவெக முன்னிலை பெற்று வருவது அரசியல் விமர்சகர்களை வியப்பில் ஆழ்த்தியுள்ளது. 1977-க்குப் பிறகு ஒரு புதிய கட்சி இவ்வளவு பெரிய வாக்குச் சதவீதத்துடன் ஆட்சியை நோக்கியோ அல்லது பிரதான எதிர்க்கட்சியாகவோ உருவெடுப்பது இதுவே முதல்முறை என்பதால், இது “விஜய்யின் வரலாற்று வெற்றி“ என்று தவெக தொண்டர்களால் உற்சாகமாகக் கொண்டாடப்பட்டு வருகிறது.
திருச்சி கிழக்கில் திமுக வேட்பாளர் இனிகோ இருதயராஜை சுமார் 20,000 வாக்குகள் வித்தியாசத்தில் விஜய் தோற்கடித்துள்ளார். முதல்வர் வேட்பாளரான அவர் போட்டியிட்ட 2 தொகுதிகளிலும் அபார வெற்றியை பதிவு செய்துள்ளார். குறிப்பாக களமிறங்கிய முதல் தேர்தலிலேயே 1.50 கோடி (30%) வாக்குகளை கடந்து தவெக பெரும் சாதனை படைத்துள்ளது.
