சித்ரா பவுர்ணமி என்பது ஆன்மிக ரீதியாகவும், அறிவியல் ரீதியாகவும் மிகவும் முக்கியத்துவம் வாய்ந்த ஒரு நாளாகும். 2026-ம் ஆண்டு மே 1-ம் தேதி (சித்திரை 18) இத்திருநாள் அமைகிறது.
சித்ரகுப்தர் வரலாறு
சித்ரா பவுர்ணமியின் மிக முக்கியமான அம்சம் எமதர்ம ராஜாவின் கணக்காளரான சித்ரகுப்தரின் பிறந்தநாளாகக் கருதப்படுவதுதான்.
பிரம்ம தேவர் தனது மனதில் இருந்து (சித்திரத்தில் இருந்து உருவானவர் என்பது ஒரு நம்பிக்கை) சித்ரகுப்தரை உருவாக்கியதாக புராணம் கூறுகிறது. மனிதர்களின் பாவ- புண்ணியங்களை மிகத் துல்லியமாகப் பதிவு செய்வது இவரது பணியாகும்.
சித்ரா பவுர்ணமி நாளில் மக்கள் சித்ரகுப்தரை வழிபட்டு, தாங்கள் செய்த தவறுகளுக்காக மன்னிப்பு கேட்பார்கள். இனிவரும் காலங்களில் நற்செயல்களை மட்டுமே செய்வோம் என உறுதி ஏற்பார்கள்.
ஆன்மிகச் சிறப்புகள்
தேவர்களின் தலைவனான இந்திரன், தான் செய்த பாவங்கள் நீங்க மதுரை மீனாட்சி அம்மன் கோயிலில் சித்திரை பவுர்ணமி நாளில் லிங்கத்தை வழிபட்டதாகப் புராணங்கள் கூறுகின்றன. இன்றும் மதுரையில் இந்த ஐதீகம் கடைபிடிக்கப்படுகிறது.
சந்திரன் முழு நிலவாக, சித்திரை நட்சத்திரத்துடன் இணைந்து வரும் இந்த நாளில் செய்யும் தான தர்மங்கள் பன்மடங்கு பலனைத் தரும் என்பது நம்பிக்கை.
தமிழகத்தின் முக்கிய விழாக்கள்
சித்ரா பவுர்ணமி அன்றுதான் அழகர் வைகை ஆற்றில் இறங்கும் வைபவம் நடைபெறும். உலகப் புகழ் பெற்ற இந்த திருவிழா, தமிழ்நாட்டின் மிகப்பெரிய திருவிழாக்களில் ஒன்றாகும்.
பவுர்ணமி நாட்களில் திருவண்ணாமலையில் கிரிவலம் செல்வது சிறப்பு என்றாலும், சித்ரா பவுர்ணமி அன்று கிரிவலம் செல்வது மிகவும் புண்ணியமாகக் கருதப்படுகிறது. அன்று லட்சக்கணக்கான பக்தர்கள் கிரிவலம் மேற்கொண்டு அண்ணாமலையாரை தரிசனம் செய்வார்கள்.
அறிவியல் பின்னணி
சித்திரை மாதம் சூரியன் மேஷ ராசியில் (உச்சம்) இருக்கும் காலம். அதே வேளையில் நிலவு துலாம் ராசியில் சித்திரை நட்சத்திரத்தில் முழுமையாக (பவுர்ணமி) பிரகாசிக்கும். சூரியன் மற்றும் சந்திரனின் ஒளிக்கதிர்கள் பூமிக்கு மிகுந்த ஆற்றலைத் தரும் நாளாக இது அறிவியல் ரீதியாகப் பார்க்கப்படுகிறது.
சித்ரா பவுர்ணமி நாளில் உப்பு சேர்க்காத உணவு அல்லது பால் சாதம் உண்டு விரதம் இருப்பது வழக்கம்.
ஏழை, எளியவர்களுக்கு அன்னதானம் செய்வது மற்றும் குடை, காலணி, விசிறி போன்ற கோடை காலத் தேவைகளைத் தானமாக வழங்குவது சிறந்தது.
