இந்தியா – பாகிஸ்தான் போரை நான் தான் நிறுத்தினேன் என்று மீண்டும் கூறியுள்ளார் அமெரிக்க அதிபர் டொனால்டு ட்ரம்ப்.
ஏற்கெனவே அவர் இவ்வாறாக 70 முறை கூறிவிட்டதாக விமர்சனங்கள் உள்ள நிலையில் அதை உறுதிப்படுத்துவது போலவே மீண்டும் அதனைக் கூறியுள்ளார் ட்ரம்ப்.
பென்சில்வேனியா மாகாணத்தில் நடந்த ஒரு பிரச்சாரப் பொதுக்கூட்டத்தில் பேசிய ட்ரம்ப் கூறியதாவது: கடந்த 10 மாதங்களில் நான் 8 போர்களை நிறுத்தியுள்ளேன். கொசோவா – செர்பியா, பாகிஸ்தான் – இந்தியா, இஸ்ரேல் – ஈரான், எகிப்து – எதியோபியா, அர்மேனியா – அசர்பைஜான், கம்போடியா – தாய்லாந்து போர்களை நான் நிறுத்தியுள்ளேன்.
அண்மையில் மீண்டும் கம்போடியா – தாய்லாந்து இடையே புகைச்சல் ஏற்பட்டது. நான் அவர்களுக்கு போன் கால் செய்து போரை நிறுத்தச் சொல்லப்போகிறேன். இப்படித்தான் இரண்டு சக்திவாய்ந்த நாடுகள் இடையேயான போரையும் தொலைபேசியில் பேசி நிறுத்தினேன். இவ்வாறு ட்ரம்ப் கூறினார்.
குடியேற்ற விதிகளில் கட்டுப்பாடு விதித்தது தொடர்பாக பேசிய ட்ரம்ப், “கடந்த 50 ஆண்டுகளில் முதன்முறையாக நம் நாட்டில் இப்போது ‘ரிவர்ஸ் மைக்ரேஷன்’ நடந்து வருகிறது. இதனால், அமெரிக்கர்களுக்கு கூடுதல் வேலைவாய்ப்பு, நல்ல சம்பளம், கூடுதல் வருமானம் கிடைக்கிறது. ‘சட்டவிரோத ஏலியன்களுக்கு’ சென்ற வாய்ப்புகள் அமெரிக்கர்களுக்கு மடைமாறியுள்ள்து. மூன்றாம் உலக நாடுகளான ஆப்கானிஸ்தான், ஹைட்டி, சோமாலியா உள்ளிட்ட 19 நாடுகளில் இருந்து மக்கள் அமெரிக்காவுக்கு குடியேறுவதை நிரந்தரமாகத் தடுத்துள்ளேன்.
ஆம், நம் நாட்டுக்குள் நார்வே, ஸ்வீடனில் இருந்தும், டென்மார்க்கில் இருந்தும் சிலர் வரட்டுமே. சோமாலியா போன்ற அழுக்கான, அசிங்கமான, அருவருப்பான, குற்றங்கள் நிறைந்த நாடுகளில் இருந்துதான் அமெரிக்காவுக்கு வரவேண்டுமா?. நல்ல மக்கள் வரட்டும்.” என்றார்.
மூன்றாம் உலக நாடுகள் எவை? 3-ம் உலக நாடுகளில் இருந்து புலம்பெயர்வோருக்கு நிரந்தரத் தடை விதிக்கப்படும் என ட்ரம்ப் அண்மையில் அறிவித்தார். அமெரிக்கா, அதன் நட்பு நாடுகள், தொழில்வளர்ச்சி பெற்ற நாடுகள் முதல் உலக நாடுகள் என்று அழைக்கப்படுகின்றன. ரஷ்யா, சீனாவை சார்ந்த நாடுகள் இரண்டாம் உலக நாடுகள் என்று கூறப்படுகின்றன.
இந்த 2 அணியிலும் இல்லாத, வளர்ந்து வரும் அல்லது பின்தங்கிய ஆப்பிரிக்க, ஆசிய, லத்தீன் அமெரிக்க நாடுகள் மூன்றாம் உலக நாடுகள் என அழைக்கப்படுகின்றன.
தற்போதைய மூன்றாம் உலக நாடுகள் பட்டியலில் ஆப்கானிஸ்தான், ஈரான், மியான்மர், காங்கோ, கியூபா, எரித்திரியா, ஹைதி, வெனிசுலா, சோமாலியா, சூடான் உள்ளிட்ட சில நாடுகள் இடம்பெற்றுள்ளன என்பது குறிப்பிடத்தக்கது.
