புதுச்சேரி தவெக எம்.எல்.ஏ ராமு, பதவியேற்கும்போது, தங்கள் கட்சியின் தலைவர் விஜய்யின் புகைப்படத்தை காண்பித்து கடவுள் எனப் பேசினார்.
புதுச்சேரியில் சமீபத்தில் நடைபெற்ற சட்டப்பேரவைத் தேர்தலில் தேசிய ஜனநாயகக் கூட்டணி (என்.டி.ஏ) தெளிவான பெரும்பான்மையுடன் வெற்றி பெற்று, தொடர்ந்து ஆட்சி அமைத்துள்ளது. என்.ஆர். காங்கிரஸ் 12 இடங்களையும், பாஜக 4 இடங்களையும், அதிமுக மற்றும் எல்.ஜே.கே தலா ஒரு இடத்தையும் கைப்பற்றியதன் மூலம் கூட்டணி மொத்தம் 18 தொகுதிகளில் வெற்றி வாகை சூடியது. எதிர்க்கட்சிகளில் திமுக 5 இடங்கள், காங்கிரஸ் ஒரு இடம், நேயம் மக்கள் கழகம் ஒன்று, தவெக 2 இடங்கள் மற்றும் சுயேச்சைகள் 3 இடங்களில் வெற்றி பெற்றன.
தேர்தல் முடிவுகளைத் தொடர்ந்து, முதலமைச்சராக என்.ஆர். காங்கிரஸ் தலைவர் என். ரங்கசாமி கடந்த 13-ம் தேதி பதவியேற்றார். அவருடன் அமைச்சர்களாக நமச்சிவாயம் மற்றும் மல்லாடி கிருஷ்ணாராவ் ஆகியோரும் பொறுப்பேற்றனர். இதனைத் தொடர்ந்து, 18-ம் தேதி அன்பழகன் புதுச்சேரி தற்காலிக சபாநாயகராக ஆளுநர் மாளிகையில் துணை நிலை ஆளுநர் கைலாசநாதன் முன்னிலையில் பதவிப் பிரமாணம் செய்து வைக்கப்பட்டார்.
இதனைத்தொடர்ந்து இன்று காலை தற்காலிக சபாநாயகர் அன்பழகன் தலைமையில் சட்டப்பேரவை கூடியது. புதிதாகத் தேர்ந்தெடுக்கப்பட்ட எம்.எல்.ஏக்கள் அனைவரும் பதவிப் பிரமாணம் செய்து கொண்டனர். முதலமைச்சர் ரங்கசாமி, மங்கலம் தொகுதி உறுப்பினராக “கடவுள் அறிய” என உறுதிமொழி ஏற்றார்.
பதவியேற்பு விழாவில் சில சுவாரசியமான மற்றும் கவனம் ஈர்க்கும் சம்பவங்கள் இடம்பெற்றன. தமிழக வெற்றிக் கழகம் (தவெக) சார்பில் மணவெளி தொகுதியில் வெற்றி பெற்ற ராமு, உறுதிமொழி வாசிக்கும்போது “கடவுள் அறிய” எனக் கூறியவாறு தவெக தலைவரும் தமிழக முதல்வருமான நடிகர் விஜய்யின் புகைப்படத்தை உயர்த்திக் காட்டினார்.
இந்தக் காட்சி உடனடியாக சமூக ஊடகங்களில் வைரலாகி பரபரப்பை ஏற்படுத்தியுள்ளது. ராமு புகைப்படம் காட்டிய சம்பவத்தைப் பார்த்த தற்காலிக சபாநாயகர் அன்பழகன், “ஏற்கனவே 1008 கடவுள்கள் இருக்க, இவர் 1009-வதா?” என நகைச்சுவையுடன் கேள்வி எழுப்பினார். மேலும், அந்தக் காட்சியை ஒளிபரப்ப வேண்டாம் எனக் கேட்டுக்கொண்டதுடன், பதிவுகளில் கூடுதல் வார்த்தைகளை நீக்குமாறு அதிகாரிகளுக்கு உத்தரவிட்டார். “இதுபோன்ற செயல்கள் யாரும் செய்யக்கூடாது” என எச்சரித்தார்.
மேலும் அதே கட்சியைச் சேர்ந்த ஏம்பலம் தொகுதி எம்.எல்.ஏ மோகன் தாஸ் “கடவுள் என்.ஆர். அறிய” எனக் கூறி பதவியேற்றார். திமுகவைச் சேர்ந்த விக்னேஷ் கண்ணன் தனது பதவியேற்பின்போது “கண்ணன் புகழ் ஓங்குக” எனக் கூடுதல் வார்த்தைகளைப் பயன்படுத்தினார். தற்காலிக சபாநாயகர் அன்பழகன், உறுப்பினர்கள் உறுதிமொழிக்கு அதிகமாகப் பேசுவதைப் பேரவைக் குறிப்பில் சேர்க்க வேண்டாம் என அறிவுறுத்தினார். மற்றொரு தவெக எம்.எல்.ஏ சாய் சரவணன் குமார் பேரவை முடிந்த பின்னர் தனியாக வந்து பதவிப் பிரமாணம் செய்தார். பிரெஞ்சு மொழியில் உறுதிமொழி ஏற்க அனுமதி கோரிய அவருக்கு சட்டப்பேரவை செயலர் அனுமதி மறுத்தார். பின்னர் அவர் மலையாளத்தில் உறுதிமொழி ஏற்றார். பாகூர் தொகுதி திமுக எம்.எல்.ஏ செந்தில் குமாரும் மலையாளத்தில் உறுதிமொழி வாசித்தார்.
இரண்டரை ஆண்டுகளுக்கு முன்பு தொடங்கப்பட்ட தவெக, தமிழ்நாட்டைப் போலவே புதுச்சேரியிலும் தனித்துப் போட்டியிட்டு இரு இடங்களில் வெற்றி பெற்றுள்ளது. இந்தப் பதவியேற்பு விழா புதுச்சேரியின் அரசியல் களத்தில் பல்வேறு உணர்வுகளையும், சுவாரசியங்களையும் பிரதிபலித்துள்ளது.
