ரிஷப் பண்ட் டெஸ்ட் போட்டிகளில் மீண்டும் தனது அசுரத்தனமான ஆட்டத்தை வெளிப்படுத்தியதை அடுத்து, சமூக வலைதளங்களில் அவர் குறித்த மீம்கள் வைரலாகி வருகின்றன.
ஐபிஎல் 2026 சீசனில் லக்னோ சூப்பர் ஜெயண்ட்ஸ் அணிக்காக விளையாடிய ரிஷப் பண்ட், எதிர்பார்த்த அளவுக்குப் பெரிய தாக்கத்தை ஏற்படுத்தவில்லை. இதனால் ஒருநாள் மற்றும் டி20 போட்டிகளில் அவரது ஃபார்ம் குறித்து விமர்சனங்கள் எழுந்தன. மேலும், ஆப்கானிஸ்தானுக்கு எதிரான ஒருநாள் தொடரிலிருந்தும் அவர் நீக்கப்பட்டார்.
ஆனால், முல்லன்பூரில் நடைபெற்று வரும் ஆப்கானிஸ்தானுக்கு எதிரான ஒரே ஒரு டெஸ்ட் போட்டியில் களம் இறங்கிய பண்ட், தனது அதிரடியான ஆட்டத்தால் விமர்சகர்களுக்குப் பதிலடி கொடுத்துள்ளார். நிதானமாகவும் அதே சமயம் தனக்கே உரிய பாணியில் சிக்ஸர்களைப் பறக்கவிட்டும் 70 பந்துகளில் அரைசதம் கடந்து அசத்தினார்.
இந்த போட்டி ரிஷப் பண்ட்டின் 50-வது டெஸ்ட் போட்டியாகும். இதன் மூலம் எம்.எஸ்.தோனி, சையத் கிர்மானி ஆகியோருக்குப் பிறகு 50 டெஸ்ட் போட்டிகளில் விளையாடிய 3-வது இந்திய விக்கெட் கீப்பர் என்ற பெருமையையும் அவர் பெற்றுள்ளார்.
ரிஷப் பண்ட்டின் இந்த விசித்திரமான ஃபார்மை வைத்து நெட்டிசன்கள் மற்றும் கிரிக்கெட் ரசிகர்கள் விதவிதமான மீம்களைப் பகிர்ந்து வருகின்றனர். டி20 மற்றும் ஒருநாள் போட்டிகள் நடக்கும்போது ‘கும்பகர்ணன்’ போல் தூங்கிவிட்டு, டெஸ்ட் போட்டி என்று வந்துவிட்டால் மட்டும் ‘ருத்ரதாண்டவம்’ ஆடுகிறார் என ரசிகர்கள் கிண்டலாக மீம்ஸ் போட்டு வருகின்றனர்.
சர்வதேச டெஸ்ட் போட்டிகளில் சிறப்பாக விளையாடுவதற்கான ஒரு பயிற்சி யாக மட்டுமே பண்ட் ஐபிஎல் தொடரைப் பயன்படுத்துகிறார்” என்று நெட்டிசன்கள் அவர் குறித்து மீம்களைத் தட்டி விடுகின்றனர்.
கேப்டன் சுப்மன் கில் மற்றும் கே.எல்.ராகுல் ஆகியோரின் சதங்களைத் தொடர்ந்து, ரிஷப் பண்ட்டின் அதிரடி அரைசதத்தால் இந்திய அணி ஆப்கானிஸ்தானுக்கு எதிராகப் பிரம்மாண்ட ரன்களைக் குவித்து வலுவான நிலையில் உள்ளது.
நேற்று தொடங்கிய முதல்நாள் ஆட்டத்தில் 3 விக்கெட்டுகளை இழந்து நிதானத்துடன் 2வது நாள் ஆட்டத்தையும் கடைபிடித்து வருகிறது இந்திய அணி. கே.எல்.ராகுலை தொடர்ந்து கேப்டன் கில்லும் சதம் விளாசி விளையாடி வருகிறார். அந்தவகையில், தற்போதைய நிலவரப்படி, 95 ஓவர் முடிவில் 3 விக்கெட்டுகள் இழப்பிற்கு 415 ரன்கள் குவித்துள்ளது இந்திய அணி. கில் 174 பந்துகளில் 125 ரன்களுடனும், பந்த் 99 பந்துகளில் 68 ரன்களுடனும் களத்தில் உள்ளனர்.
