பிரிட்டன் பிரதமர் கெய்ர் ஸ்டார்மர் தனது பதவியை அதிரடியாக ராஜினாமா செய்துள்ளார். ஆளும் தொழிற்கட்சிக்குள்ளேயே (Labour Party) அவருக்கு எதிராக எழுந்த கடுமையான உட்கட்சி நெருக்கடி மற்றும் எதிர்ப்புகள் காரணமாக அவர் இந்த தற்காலிக முடிவை எடுத்துள்ளார். புதிய பிரதமர் தேர்ந்தெடுக்கப்படும் வரை அவர் இடைக்காலப் பிரதமராக நீடிப்பார் என அறிவிக்கப்பட்டுள்ளது.
லண்டனில் உள்ள பிரதமரின் அதிகாரப்பூர்வ இல்லமான ’10 டவுனிங் தெரு’ வாசலில் தனது மனைவியுடன் வந்து செய்தியாளர்களைச் சந்தித்த ஜெய்ர் ஸ்டார்மர், தனது ராஜினாமா முடிவை உருக்கமாக வெளியிட்டார். அப்போது அங்கு திரண்டிருந்தவர்கள் கைதட்டி அவருக்கு ஆதரவு தெரிவித்தனர்.
அவர் பேசுகையில், “அடுத்த பொதுத்தேர்தலில் கட்சியை வழிநடத்த நான் சரியான நபரா என்ற கேள்வி என் கட்சியினரிடையே எழுந்துள்ளது. நாடாளுமன்றக் குழுவின் அந்தப் பதிலுக்கு நான் தலைவணங்குகிறேன். நான் எடுத்த ஒவ்வொரு முடிவும் இந்த நாட்டின் நலனை மட்டுமே முன்வைத்து எடுக்கப்பட்டது. அதனால் தான் நான் தொழிற்கட்சியின் தலைவர் பதவியில் இருந்து விலகுகிறேன்.”
மேலும், இந்த முடிவை பிரிட்டன் மன்னர் மூன்றாம் சார்லஸிடம் இன்று காலையே தெரிவித்துவிட்டதாகவும், பிரிட்டன் நாட்டின் பிரதமராகப் பொறுப்பேற்றதே தனது வாழ்வின் பெருமிதமான தருணம் என்றும் அவர் கூறினார். உரையின் இறுதியில் சற்றே உணர்ச்சிவசப்பட்ட ஸ்டார்மர், இனி தனது குடும்பத்துடனும் குழந்தைகளுடனும் அதிக நேரத்தைச் செலவிட்டு, ஒரு நல்ல கணவனாகவும் தந்தையாகவும் இருக்கப்போவதாகக் கூறினார்.
பிரிட்டன் பிரதமராக 2 ஆண்டுகளுக்கும் மேலாகப் பதவி வகித்து வந்த கெய்ர் ஸ்டார்மரின் இந்த திடீர் விலகலுக்குப் பின்னால் பல்வேறு அரசியல் காரணங்கள் உள்ளன. மான்செஸ்டர் நகரின் முன்னாள் மேயரும், மக்கள் செல்வாக்கு மிக்க தலைவருமான ஆண்டி பர்ன்ஹாம் (Andy Burnham) கடந்த வாரம் நடைபெற்ற இடைத்தேர்தலில் வெற்றி பெற்றார். அவர் ஸ்டார்மரின் தலைமைப் பதவிக்குப் போட்டியிடத் தயாரானதே இந்த மாற்றத்தின் முக்கியப் புள்ளி.
தொழிற்கட்சியின் பெரும்பாலான நாடாளுமன்ற உறுப்பினர்களும் அமைச்சரவையின் முக்கியத் தலைவர்களும் ஸ்டார்மருக்கு அளித்து வந்த ஆதரவை விலக்கிக்கொண்டு, ஆண்டி பர்ன்ஹாமுக்கு ஆதரவாக மாறினர்.
பிரிட்டனின் வரிவிதிப்புக் கொள்கைகள், பொருளாதார மந்தநிலை, மக்கள் மத்தியில் சரிந்த செல்வாக்கு மற்றும் பீட்டர் மேண்டல்சன் போன்ற சில முக்கிய உயர் அதிகாரிகளின் நியமனங்கள் தொடர்பாக எழுந்த சர்ச்சைகளும் அவரது வீழ்ச்சிக்குக் காரணமாக அமைந்தன.
அதிகாரப் பகிர்வு சுமுகமாக நடப்பதை தான் உறுதி செய்யப் போவதாகவும், தனக்கு அடுத்து வரவிருக்கும் புதிய பிரதமருக்கு முழு ஆதரவு அளிப்பேன் என்றும் ஸ்டார்மர் உறுதியளித்துள்ளார். பிரிட்டனின் புதிய தலைவரைத் தேர்ந்தெடுக்கும் பணிகள் வரும் வாரங்களில் ஆளும் தொழிற்கட்சியால் தொடங்கப்படவுள்ளன.
