கேரள மாநிலம் வயநாட்டில் ஏற்பட்ட நிலச்சரிவில் 2 பேர் உயிரிழந்ததற்கு ஆழ்ந்த இரங்கல் தெரிவித்துள்ள வயநாடு மக்களவைத் தொகுதி எம்.பி. பிரியங்கா காந்தி, பாதிக்கப்பட்ட மக்களுக்கு அனைத்து உதவிகளையும் வழங்குமாறு ஐக்கிய ஜனநாயக முன்னணி (UDF) நிர்வாகிகள் மற்றும் தொண்டர்களுக்கு வேண்டுகோள் விடுத்துள்ளார்.
கேரள சுகாதாரத் துறை அமைச்சர் கே. முரளீதரன், இந்த நிலச்சரிவில் 2 பேர் உயிரிழந்ததை உறுதிப்படுத்தினார். வயநாடு சுரங்கப்பாதை கட்டுமானப் பணியிடத்தில் ஏற்பட்ட நிலச்சரிவில் காயமடைந்த தொழிலாளர்களுக்கு மேம்பட்ட சிகிச்சை அளிக்க வயநாடு மருத்துவமனைக்கு உத்தரவிடப்பட்டுள்ளதாகவும் அவர் தெரிவித்தார்.
சமூக வலைதளமான ‘எக்ஸ்’ தளத்தில் பதிவிட்டுள்ள பிரியங்கா காந்தி, நிலச்சரிவில் சிக்கியவர்களை மீட்கும் பணிகள் தீவிரமாக நடைபெற்று வருவதாகக் கூறியுள்ளார்.
அவர் தனது பதிவில், “முதல்வர் வி.டி. சதீசன் நேரடியாக நிவாரணப் பணிகளை கண்காணித்து வருகிறார். காவல்துறை, தேசிய பேரிடர் மீட்புப் படை (NDRF), மாநில பேரிடர் மீட்புப் படை (SDRF), சிவில் பாதுகாப்பு தன்னார்வலர்கள் உள்ளிட்டோர் சம்பவ இடத்தில் மீட்புப் பணியில் ஈடுபட்டுள்ளனர். மாவட்ட நிர்வாகம், அமைச்சர்கள் டி. சித்திக், ஏ.பி. அனில் குமார் மற்றும் உள்ளூர் நிர்வாகிகளுடன் தொடர்ந்து ஒருங்கிணைந்து செயல்பட்டு வருகிறோம்” என்று தெரிவித்துள்ளார்.
மேலும், “தங்களின் அன்புக்குரியவர்களை இழந்த குடும்பங்களுக்கு எனது ஆழ்ந்த இரங்கலைத் தெரிவித்துக் கொள்கிறேன். இந்த கடினமான நேரத்தில் அவர்களுடன் நாங்கள் துணையாக இருப்போம். இன்னும் மீட்கப்படாதவர்களுக்காக பிரார்த்திக்கிறோம். மீட்புப் பணிகளுக்கு எந்தவித இடையூறும் ஏற்படாத வகையில், நிர்வாகத்தின் வழிகாட்டுதல்களைப் பின்பற்றி அனைவரும் உதவ வேண்டும்” என்றும் அவர் கேட்டுக் கொண்டுள்ளார்.
வயநாடு சுரங்கப்பாதை கட்டுமானப் பகுதியில் ஏற்பட்ட நிலச்சரிவால் கட்டுமான அமைப்பு இடிந்து விழுந்தது.
இந்த சம்பவம் குறித்து கேரள முதலமைச்சர் வி.டி. சதீசன், மாவட்ட பேரிடர் மேலாண்மை ஆணையம் பலமுறை எச்சரித்த போதிலும், தோண்டி எடுக்கப்பட்ட மண்ணை அகற்ற ஒப்பந்ததாரர்கள் நடவடிக்கை எடுக்காததே இந்த விபத்துக்கு காரணம் என குற்றம்சாட்டினார்.
கேரள அமைச்சர் டி. சித்திக், “இது இயற்கை பேரிடர் அல்ல; அலட்சியத்தால் ஏற்பட்ட மனிதர்களால் உருவாக்கப்பட்ட பேரிடர்” என்று குற்றம்சாட்டினார். ஆபத்து குறித்து முன்கூட்டியே கொங்கண் ரயில்வே நிர்வாகத்துக்கு எச்சரிக்கை விடுக்கப்பட்டும், தடுப்பு நடவடிக்கைகள் எடுக்கப்படவில்லை என்றும் அவர் தெரிவித்தார்.
8 பேர் உயிருடன் மீட்பு
நிலச்சரிவு ஏற்பட்ட பகுதியில் இருந்து ஹிரா குமார் (32), திலீப் (19), சூரஜ் யாதவ் (25), சஞ்சய் தாக்கூர் (35), ரஜ்னீஷ் (27), தன்மய் கோஷ் (28), கூப்பமல் (ஜெயா) (37), குஞ்சு (39) ஆகிய 8 பேர் உயிருடன் மீட்கப்பட்டனர். அவர்கள் மேப்பாடி WIMS மருத்துவமனைக்கு அனுப்பப்பட்டு சிகிச்சை பெற்று வருகின்றனர்.
