ஃபிஃபா உலகக்கோப்பை 2026-ன் குரூப் எஃப் பிரிவில் நடந்த விறுவிறுப்பான ஆட்டத்தில், துனிசியாவை 5-1 என்ற கோல் கணக்கில் ஸ்வீடன் அணி எளிதாக வீழ்த்தியது. இந்த போட்டியில் கிரிக்கெட் விளையாட்டில் பயன்படுத்தப்படும் ‘ஸ்னிக்கோ’ (Snicko) போன்ற ஒரு அதிநவீன தொழில்நுட்பம், ஸ்வீடன் வீரர் மத்தியாஸ் ஸ்வன்பெர்க்கின் (Mattias Svanberg) கோல் சர்ச்சைக்கு முற்றுப்புள்ளி வைத்து, உலகக்கோப்பையில் புதிய வரலாற்றை எழுதியுள்ளது.
இந்த மாஸ் வெற்றியின் மூலம் ஸ்வீடன் அணி தனது பிரிவில் புள்ளிப்பட்டியலில் முதலிடத்திற்கு முன்னேறியுள்ளது. போட்டியின் 84-வது நிமிடத்தில் ஒரு சுவாரசியமான திருப்பம் ஏற்பட்டது. ஸ்வீடன் வீரர் அயாரி கொடுத்த பாஸை, மாற்று வீரராக களம் புகுந்த மத்தியாஸ் ஸ்வன்பெர்க், துனிசிய தற்காப்பு வீரர்களை ஏமாற்றி கோலாக மாற்றினார். ஆனால், அவர் ‘ஆஃப்சைடு’ பகுதியில் இருந்ததாகக் கூறி நடுவர் அந்த கோலை மறுத்தார்.
இதையடுத்து, நடுவர்கள் நீண்ட வீடியோ சோதனையை (VAR) மேற்கொண்டனர். அப்போது கிரிக்கெட்டில் பேட்டில் பந்து பட்டதா என்று பார்ப்பதற்கான ‘ஸ்னிக்கோ’ போன்ற அதிநவீன சென்சார் தொழில்நுட்பம் பயன்படுத்தப்பட்டது. அதில், ஸ்வன்பெர்க்கிற்கு பந்து செல்வதற்கு முன்னதாக, லிவர்பூல் நட்சத்திர வீரர் அலெக்சாண்டர் இசாக்கின் ஷூ, பந்தின் மீது லேசாக உரசிச் சென்றது துல்லியமாகக் கண்டுபிடிக்கப்பட்டது. இதனால் ‘ஆஃப்சைடு’ விதிமுறை ரத்தாகி, ஸ்வீடன் அணிக்கு கோல் வழங்கப்பட்டது.
மைதானத்திற்குள் மாற்று வீரராக களம் இறங்கிய வெறும் 18 வினாடிகளிலேயே ஸ்வன்பெர்க் இந்த கோலை அடித்தார். இதன் மூலம் 1966-ஆம் ஆண்டுக்குப் பிறகு, உலகக்கோப்பை வரலாற்றில் மாற்று வீரராக வந்து அதிவேகமாக கோல் அடித்த இரண்டாவது வீரர் என்ற சாதனையை அவர் படைத்தார். (2002-ல் உருகுவேயின் ரிச்சர்ட் மோரல்ஸ் 16 வினாடிகளில் கோல் அடித்ததே முதலிடத்தில் உள்ளது).
போட்டியின் ஆரம்பம் முதலே ஸ்வீடன் அணி ஆதிக்கம் செலுத்தியது. யாசின் அயாரி ஆட்டத்தின் 7-வது நிமிடத்திலும், பின்னர் கூடுதல் நேரத்திலும் என இரண்டு சூப்பர் கோல்களை அடித்தார். இதுதவிர, அலெக்சாண்டர் இசாக் மற்றும் விக்டர் கியோகெரெஸ் ஆகியோரும் தலா ஒரு கோல் அடித்து அணியின் இமாலய வெற்றிக்கு உதவினர். துனிசிய அணியால் ஒரே ஒரு கோல் மட்டுமே அடிக்க முடிந்தது.
குரூப் ‘F’ பிரிவின் மற்றொரு போட்டியில் நெதர்லாந்து மற்றும் ஜப்பான் அணிகள் 2-2 என டிரா செய்தன. இதனால் 3 புள்ளிகளுடன் ஸ்வீடன் முதலிடத்தில் உள்ளது. தனது அடுத்தடுத்த லீக் போட்டிகளில் ஜூன் 20 அன்று நெதர்லாந்தையும், ஜூன் 26 அன்று ஜப்பானையும் ஸ்வீடன் எதிர்கொள்ளவுள்ளது.
