தமிழ்நாடு முதலமைச்சர் சி. ஜோசப் விஜய் நேற்று சைதாப்பேட்டையில் உள்ள எம்.சி. ராஜா சமூக நீதி மாணவர் விடுதியில் திடீர் ஆய்வு மேற்கொண்டபோது, மாணவர்கள் தங்கள் பல்வேறு குறைகளை நேரடியாகத் தெரிவித்தனர். இதையடுத்து சமூக நீதித்துறை இன்று பல முக்கிய உத்தரவுகளை பிறப்பித்துள்ளது.
முதலமைச்சர் ஆய்வின்போது மாணவர்கள் முன்வைத்த முக்கிய புகார்கள் உணவு தரம், விடுதி வசதிகள் மற்றும் நுழைவு நேரம் தொடர்பானவை. விடுதியில் வழங்கப்படும் உணவு மிகவும் தரமற்ற நிலையில் இருப்பதாகவும், பலமுறை புகார் அளித்தும் எந்த நடவடிக்கையும் எடுக்கப்படவில்லை எனவும் மாணவர்கள் தெரிவித்தனர். அரசு பல்வேறு வசதிகளை ஏற்பாடு செய்திருந்தும், நடைமுறையில் பிரச்னைகள் தொடர்வதாகவும் அவர்கள் சுட்டிக்காட்டினர்.
கடந்த ஆண்டு அனைத்து இந்திய மாணவர் பெருமன்றம் (AISF) சார்பில் முற்றுகைப் போராட்டம் நடத்தப்பட்டதும், புழுக்கள் கலந்த அசைவ உணவு பிரச்னைக்குப் பிறகு ஐந்து நாட்கள் மட்டும் தரமான உணவு வழங்கப்பட்டு மீண்டும் பழைய நிலைக்குத் திரும்பியதும் மாணவர்களின் முக்கிய குற்றச்சாட்டுகளாக இருந்தன. மேலும், பகுதி நேர வேலை செய்து டிஎன்பிஎஸ்சி உள்ளிட்ட போட்டித் தேர்வுகளுக்கு தயாராகும் மாணவர்கள் இரவு 10 மணிக்கு மேல் விடுதிக்கு வந்தால் கதவு மூடப்பட்டுவிடுவதால் வெளியில் தூங்கும் அவலநிலை ஏற்படுவதாகவும் புகார் எழுந்தது.
இந்தப் புகார்களைத் தொடர்ந்து முதலமைச்சர் உடனடி நடவடிக்கைக்கு உத்தரவிட்டதை அடுத்து, சமூக நீதித்துறை அதிகாரிகள் பல்வேறு தீர்வுகளை அறிவித்துள்ளனர். உணவுப் பட்டியலை உடனடியாக மாற்றி, சிலிண்டர் தட்டுப்பாடு காரணமாக நிறுத்தப்பட்ட இட்லி மற்றும் சப்பாத்தியை மீண்டும் வழங்க உத்தரவிடப்பட்டுள்ளது. விடுதியில் கட்டி முடிக்கப்பட்டும் இதுவரை திறக்கப்படாத கைப்பந்து மைதானத்தை மாணவர்களின் பயன்பாட்டுக்கு உடனடியாகத் திறக்க நடவடிக்கை எடுக்கப்பட்டுள்ளது.
பகுதி நேரப் பணிக்குச் செல்லும் மாணவர்கள் இரவு 12 மணி வரை விடுதிக்குள் நுழைய அனுமதி அளிக்கப்பட்டுள்ளது. மேலும், மாணவர்களுக்கு தரமான உணவு வழங்கப்படுவதை தொடர்ந்து கண்காணிக்க இரண்டு அதிகாரிகள் நியமிக்கப்பட்டுள்ளதாக சமூக நீதித்துறை தெரிவித்துள்ளது. மாணவர்களின் குறைகளுக்கு விரைவான தீர்வு காணப்பட்டதால் விடுதியில் நல்ல வரவேற்பு காணப்படுகிறது. இந்த நடவடிக்கைகள் அரசின் சமூக நீதித் திட்டங்களின் செயல்பாட்டை மேம்படுத்தும் என எதிர்பார்க்கப்படுகிறது.
