உலகக் கோப்பை கால்பந்து தொடரில் ரவுண்ட் ஆஃப் 32 சுற்றில் போர்ச்சுகலிடம் 2-1 என்ற கோல் கணக்கில் தோல்வியடைந்து வெளியேறியதைத் தொடர்ந்து, குரோஷியா அணியின் தலைமைப் பயிற்சியாளர் ஸ்லாட்கோ டாலிச் தனது பதவியை ராஜினாமா செய்துள்ளார்.
குரோஷியா கால்பந்து சம்மேளனம் சமூக வலைதளப் பதிவின் மூலம் இதனை அதிகாரப்பூர்வமாக அறிவித்துள்ளது.
அந்த பதிவில், கடந்த ஒன்பது ஆண்டுகளாக தேசிய அணியை சிறப்பாக வழிநடத்திய டாலிச்சுக்கு நன்றி தெரிவிக்கப்பட்டுள்ளது. வெற்றிகள், உலகக் கோப்பை தகுதிகள், பதக்கங்கள், அணியின் ஒற்றுமை, மைதானத்திலும் அதற்கு வெளியேயும் நாட்டிற்காக அவர் வெளிப்படுத்திய அர்ப்பணிப்பு ஆகியவற்றை சம்மேளனம் பாராட்டியுள்ளது. மேலும், வீரர்கள், பயிற்சியாளர்கள் மற்றும் எதிரணியினரிடமும் அவர் பெற்ற மரியாதை அவரது சிறந்த ஆளுமைக்கு சான்று என குறிப்பிட்டுள்ளது.
“எளிமையான வருகை… மறக்க முடியாத பயணம்… பெருமைமிக்க விடை. குரோஷியா அணியுடன் ஒன்பது ஆண்டுகள் நீண்ட மிகச் சிறப்பான அத்தியாயத்தை ஸ்லாட்கோ டாலிச் நிறைவு செய்துள்ளார். வெற்றிகள், சாதனைகள், உலகக் கோப்பை தகுதிகள், பதக்கங்கள், ஒற்றுமை மற்றும் குரோஷியாவுக்காக அவர் காட்டிய அர்ப்பணிப்புக்கு நன்றி” என்று அந்த பதிவில் தெரிவிக்கப்பட்டுள்ளது.
டாலிச் பயிற்சியாளராக இருந்த காலத்தில் குரோஷியா அணி உலக அரங்கில் குறிப்பிடத்தக்க வெற்றிகளைப் பெற்றது. 2018 ஃபிஃபா உலகக் கோப்பையில் இரண்டாம் இடத்தையும், 2022 உலகக் கோப்பையில் மூன்றாம் இடத்தையும் பிடித்து சாதனை படைத்தது. ஆனால், 2026 உலகக் கோப்பையில் பதக்கம் வெல்ல முடியாமல் அணி ஏமாற்றத்துடன் வெளியேறியது.
இந்த உலகக் கோப்பை தொடரில் குரோஷியா தனது முதல் போட்டியில் இங்கிலாந்திடம் 4-2 என்ற கோல் கணக்கில் தோல்வியடைந்தது. பின்னர் பனாமாவை 1-0 மற்றும் கானாவை 2-1 என்ற கோல் கணக்கில் வீழ்த்தி நாக் அவுட் சுற்றுக்கு முன்னேறியது. எனினும், ரவுண்ட் ஆஃப் 32 சுற்றில் போர்ச்சுகலிடம் 2-1 என்ற கோல் கணக்கில் தோல்வியடைந்து தொடரிலிருந்து வெளியேறியது.
அணியின் தோல்விக்குப் பிறகு தனது எதிர்காலம் குறித்து பேசிய டாலிச், “அடுத்த உலகக் கோப்பையில் என்ன நடக்கும் என்பதை கடவுள்தான் அறிவார். இதுகுறித்து குரோஷியாவுக்குத் திரும்பிய பிறகு பேசுவோம்” என்று தெரிவித்துள்ளார்.
