பெனால்டி சூட்-அவுட் சாபம்!. மொராக்கோவிடம் தோற்று உலகக்கோப்பையை விட்டு வெளியேறிய நெதர்லாந்து!

2026 பிஃபா உலகக்கோப்பையின் விறுவிறுப்பான 32-வது சுற்று ஆட்டத்தில் நெதர்லாந்து அணியை பெனால்டி சூட்-அவுட் முறையில் வீழ்த்தி மொராக்கோ அணி அடுத்த சுற்றுக்கு முன்னேறியுள்ளது. உலகக்கோப்பை வரலாற்றில் நெதர்லாந்து அணி தனது மிக மோசமான மற்றும் ஆரம்பக்கட்ட தோல்வியைச் சந்தித்து தொடரிலிருந்து வெளியேறியுள்ளது ரசிகர்களுக்குப் பெரும் அதிர்ச்சியை ஏற்படுத்தியுள்ளது.

மெக்ஸிகோவின் மான்டேரி மைதானத்தில் நடைபெற்ற இந்த ஆட்டத்தில், ஆரம்பம் முதலே இரு அணிகளும் சமபலத்துடன் மோதின. ஆட்டத்தின் 72-வது நிமிடத்தில் நெதர்லாந்தின் நட்சத்திர வீரர் கோடி காக்போ (Cody Gakpo) ஒரு அபாரமான கோல் அடித்து தனது அணியை 1-0 என முன்னிலைப்படுத்தினார். நெதர்லாந்து அணியின் வெற்றி உறுதியாகிவிட்டதாகக் கருதப்பட்ட நிலையில், ஆட்டத்தின் கூடுதல் நேரத்தில் (91-வது நிமிடம்) மொராக்கோவின் இசா தியோப் (Issa Diop) தலையால் முட்டி ஒரு சிறப்பான கோல் அடித்தார். இதனால் ஆட்டம் 1-1 என்ற கணக்கில் சமநிலையை எட்டியது.

இதனைத் தொடர்ந்து வழங்கப்பட்ட கூடுதல் நேர ஆட்டத்தின்போது மொராக்கோ அணிக்கு ஒரு தங்கமான வாய்ப்பு கிடைத்தது. டச்சு தற்காப்பு வீரர்களைத் தாண்டி முன்னேறிய சுஃப்யான் ரஹீமி,கோல்கீப்பர் பார்ட் வெர்ப்ரூக்கனை  மட்டுமே எதிர்கொள்ள வேண்டியிருந்தது. ஆனால், அவர் அடித்த பந்தை வெர்ப்ரூக்கன் தனது முட்டியால் தடுத்து நெதர்லாந்து அணியை ஆபத்திலிருந்து காப்பாற்றினார்.

கூடுதல் நேர முடிவிலும் ஆட்டம் 1-1 என சமனில் நீடித்ததால், வெற்றியாளரைத் தீர்மானிக்க பெனால்டி சூட்-அவுட் முறை கொண்டுவரப்பட்டது. இதில் பதற்றமின்றி விளையாடிய மொராக்கோ அணி 3 கோல்களை அடிக்க, நெதர்லாந்து அணியால் 2 கோல்களை மட்டுமே அடிக்க முடிந்தது. இறுதியில் 3-2 என்ற கணக்கில் மொராக்கோ வரலாற்று வெற்றியைப் பெற்றது. 2022 உலகக்கோப்பையில் ஸ்பெயினை பெனால்டி முறையில் வீழ்த்திய மொராக்கோ அணி, உலகக்கோப்பையில் பெறும் இரண்டாவது பெனால்டி சூட்-அவுட் வெற்றி இதுவாகும்.

இந்தத் தோல்வியின் மூலம் உலகக்கோப்பை வரலாற்றில் 4-வது முறையாக நெதர்லாந்து அணி பெனால்டி சூட்-அவுட்டில் தோல்வியைத் தழுவியுள்ளது. இதற்கு முன்பு 1998 (பிரேசிலிடம்), 2014 மற்றும் 2022 (அர்ஜென்டினாவிடம்) ஆகிய ஆண்டுகளில் நெதர்லாந்து பெனால்டி முறையில் தோற்றிருந்தது. இதன் மூலம் உலகக்கோப்பையில் அதிக முறை (4 முறை) பெனால்டி சூட்-அவுட்டில் தோற்ற ஸ்பெயின் அணியின் மோசமான சாதனையை தற்போது நெதர்லாந்தும் சமன் செய்துள்ளது.