தமிழக பள்ளிக்கல்வித் துறையில் வரும் 2027-2028 கல்வியாண்டிலிருந்து 6 மற்றும் 7 ஆம் வகுப்பு மாணவர்களுக்கான பாடப்புத்தக விநியோக முறையில் முக்கிய மாற்றம் எதிர்பார்க்கப்படுகிறது. தற்போது அமலில் உள்ள முப்பருவ முறைக்குப் பதிலாக, ஒவ்வொரு பாடத்திற்கும் ஆண்டு முழுவதும் ஒரே புத்தகம் வழங்கப்படும் திட்டம் பரிசீலனையில் உள்ளது.
தற்போதைய நிலையில், தமிழக அரசுப் பாடத்திட்டத்தில் 8 முதல் 12 ஆம் வகுப்பு வரை பயிலும் மாணவர்களுக்கு ஆண்டு முழுவதும் ஒரே பாடப்புத்தகம் வழங்கப்பட்டு, அதன் அடிப்படையில் தேர்வுகள் நடத்தப்படுகின்றன. ஆனால் 1 முதல் 7 ஆம் வகுப்பு வரை முப்பருவ முறை பின்பற்றப்படுகிறது. அதாவது ஒவ்வொரு மூன்று மாதங்களுக்கும் தனித்தனி புத்தகங்கள் வழங்கப்பட்டு, காலாண்டு, அரையாண்டு மற்றும் ஆண்டு இறுதித் தேர்வுகள் நடத்தப்படுகின்றன.
இந்த முறையை 6 மற்றும் 7 ஆம் வகுப்புகளுக்குக் கைவிட்டு, உயர் வகுப்புகளைப் போல ஒரே புத்தக முறைக்கு மாற்றத் திட்டமிடப்பட்டுள்ளதாகத் தகவல்கள் தெரிவிக்கின்றன. பள்ளிக்கல்வித் துறை வட்டாரங்கள் இதுகுறித்து கூறுகையில், “அடுத்த கல்வியாண்டு முதல் 6, 7 ஆம் வகுப்புகளுக்கு ஒரே பாடப்புத்தகத்தை உருவாக்கும் முடிவு இன்னும் பரிசீலனையில் உள்ளது. ஆசிரியர்கள் மற்றும் பிற பணியாளர்களுடன் இன்னும் முழுமையாகக் கலந்தாலோசிக்கப்படவில்லை. எனினும் இத்தகைய தகவல்கள் பரவி வருகின்றன” எனத் தெரிவித்தனர்.
இது முதல் முறையல்ல. முன்பு 8 ஆம் வகுப்பிற்கும் முப்பருவ முறை இருந்தது. சுமார் மூன்று ஆண்டுகளுக்கு முன் அது கைவிடப்பட்டு ஒரே புத்தக முறை அறிமுகப்படுத்தப்பட்டது. முப்பருவ பாடத்திட்டம் 2012-13 கல்வியாண்டில் முன்னாள் முதல்வர் ஜெயலலிதா ஆட்சியில் அறிமுகப்படுத்தப்பட்டது. மாணவர்களின் புத்தகப் பை சுமையைக் குறைக்கும் நோக்கில் 1 முதல் 8 ஆம் வகுப்பு வரை அமல்படுத்தப்பட்ட இம்முறை, இப்போது படிப்படியாக மாற்றப்பட்டு வருகிறது.
மாநிலக் கல்விக் கொள்கையின் அடிப்படையில் பாடத்திட்ட மேம்பாடுகள் நடைபெற்று வரும் நிலையில், இந்த மாற்றம் தொடர்ச்சியான கற்றல் மற்றும் உயர் வகுப்புகளுடன் ஒருங்கிணைப்பை எளிதாக்கும் எனக் கருதப்படுகிறது. இருப்பினும் இறுதி முடிவு அதிகாரப்பூர்வமாக அறிவிக்கப்பட வேண்டியுள்ளது. மாணவர்கள், ஆசிரியர்கள் மற்றும் பெற்றோர்களின் கருத்துக்கள் கேட்கப்பட்ட பின்னரே முழுமையான அமலாக்கம் நடைபெற வாய்ப்புள்ளது.
