அமெரிக்கா – ஈரான் இடையேயான போர் 40 நாட்களாக நீடித்த நிலையில் கடந்த 7-ம் தேதி வரை தற்காலிக போர் நிறுத்தம் அறிவிக்கப்பட்டது. இரு நாடுகள் இடையே பாகிஸ்தானில் நடந்த அமைதி பேச்சுவார்த்தை தோல்வியில் முடிந்தது. ஈரானுக்கு நெருக்கடி தரும் வகையில் ஹார்முஸ் நீர் முனை மற்றும் ஈரானின் துறைமுகங்களை அமெரிக்க போர்க் கப்பல்கள் முற்றுகையிட்டன.
ஈரான் நோக்கி பயணித்த சரக்கு கப்பல்களை அமெரிக்கா சிறைபிடித்ததற்கு ஈரான் கடும் எதிர்ப்பு தெரிவித்தது. இருநாடுகளிடையே 2-ம் கட்ட அனுமதி பேச்சுவார்த்தை மேற்கொள்ள பாகிஸ்தான் தீவிரமாக முயற்சி செய்து வரும் நிலையில், தற்காலிக போர் நிறுத்தத்தை கூடுதலா ஒருநாள், இன்றுடன் நீடித்து அமெரிக்க அதிபர் டிரம்ப் உத்தரவிட்டார்.
தற்காலிக போர் நிறுத்தம் இன்றுடன் முடிவடையும் நிலையில் ஈரான் உடனான போர் நிறுத்தத்தை மேலும் நீட்டிப்பதாக அமெரிக்க அதிபர் டிரம்ப் அறிவித்துள்ளார். ஈரான் ஒருங்கினைந்த அமைதித் திட்டத்தை முன்வைக்கும் வரை கால அவகாசம் வழங்கப்படுவதாக தெரிவித்துள்ளார். தாக்குதல் ஒத்தி வைக்கப்பட்டாலும், ஈரானிய துறைமுகங்களை முற்றுகையிடுவது தொடரும் என டிரம்ப் அறிவித்துள்ளார்.
டிரம்பின் போர்நிறுத்த நீட்டிப்பு முடிவு சர்வதேச நாடுகளிடையே நிம்மதியை ஏற்படுத்தியுள்ளது. போர் நிறுத்தத்தை நீட்டித்ததற்காக டிரம்புக்கு பாகிஸ்தான் பிரதமர் ஷெபாஸ் ஷெரீப் நன்றி தெரிவித்துள்ளார். ஈரான் துறைமுகங்களை அமெரிக்கா முற்றுகையிட்டது போர் நடவடிக்கை என்றும், மிரட்டல்களை எவ்வாறு எதிர்கொள்வது என ஈரானுக்கு தெரியும் என ஈரான் வெளியுறவுத்துறை அமைச்சர் அப்பாஸ் அராக்ச்சி தெரிவித்துள்ளார்.
