முழுமையடையும் தவெக அமைச்சரவை – ஆதரவு அதிமுகவின் நிலை என்ன?

தமிழ்நாடு அமைச்சரவையில் அதிமுகவின் சி.வி. சண்முகம் தரப்புக்கு பதவி வழங்குவதில் சாத்தியமில்லை எனத் தகவல்கள் வெளியாகியுள்ளன.

சென்னை: தமிழக வெற்றிக் கழகம் (தவெக) தலைமையிலான ஆட்சியில் அமைச்சரவை விரிவாக்கம் முடிவடைந்த நிலையில், இரண்டு இடங்கள் மட்டுமே காலியாக உள்ளன. அ.தி.மு.க.வின் சி.வி.சண்முகம் தரப்பினருக்கு அமைச்சர் பதவி வழங்கும் வாய்ப்பு மிகவும் குறைந்துவிட்டதாக அரசியல் வட்டாரங்கள் தெரிவிக்கின்றன. இதனால், தவெக அரசுக்கு வெளிப்புற ஆதரவு அளித்த அ.தி.மு.க. அதிருப்தி அணியினரிடையே மீண்டும் குழப்பம் ஏற்பட்டுள்ளது.

கடந்த மே 10ஆம் தேதி சென்னை நேரு உள்விளையாட்டு அரங்கில் பிரம்மாண்ட பதவியேற்பு விழா நடைபெற்றது. தமிழக வெற்றிக் கழகத்தின் தலைவர் விஜய் முதலமைச்சராக பதவியேற்றுக்கொண்டார். அவருடன் முதல் கட்டமாக 9 அமைச்சர்களும் பொறுப்பேற்றனர். இன்று சென்னை கிண்டி ஆளுநர் மாளிகையில் இரண்டாவது கட்ட அமைச்சரவை விரிவாக்கம் நடைபெற்றது. இதில் தவெகவைச் சேர்ந்த 21 பேர் மற்றும் காங்கிரஸ் கட்சியைச் சேர்ந்த 2 பேர் அமைச்சர்களாக பதவியேற்றனர்.

தமிழ்நாடு அமைச்சரவையில் மொத்தம் 35 பேருக்கு இட ஒதுக்கீடு உள்ள நிலையில், தற்போது 33 அமைச்சர்கள் பதவியில் உள்ளனர். மீதமுள்ள இரு இடங்கள் யாருக்கு ஒதுக்கப்படும் என்பது அரசியல் களத்தில் பெரும் எதிர்பார்ப்பை ஏற்படுத்தியிருந்தது. கடந்த சில நாட்களாக அ.தி.மு.க.வின் சில எம்.எல்.ஏ.க்களுக்கு, குறிப்பாக சி.வி.சண்முகம் அணியினருக்கு அமைச்சர் பதவி வாய்ப்பு கிடைக்கலாம் என்ற தகவல்கள் பரவின. ஆனால், கூட்டணி கட்சிகள் இதற்கு கடும் எதிர்ப்பு தெரிவித்ததால் திட்டம் கைவிடப்பட்டதாகக் கூறப்படுகிறது.

விடுதலைச் சிறுத்தைகள் கட்சித் தலைவர் தொல்.திருமாவளவன் தலைமையிலான விசிக மற்றும் இடதுசாரி கட்சிகள், அ.தி.மு.க.வுக்கு அமைச்சரவையில் இடம் அளித்தால் தங்கள் ஆதரவை மறுபரிசீலனை செய்வோம் என எச்சரிக்கை விடுத்திருந்தன. இதையடுத்து, தவெக தரப்பு அ.தி.மு.க.வுக்கு இடமில்லை என தெளிவுபடுத்தியதாக திருமாவளவன் ஏற்கெனவே செய்தியாளர்களிடம் தெரிவித்தார். இன்று வெளியான பட்டியலில் அ.தி.மு.க. எம்.எல்.ஏ. எவரின் பெயரும் இடம்பெறவில்லை. இது அ.தி.மு.க. தரப்பில் அதிருப்தியை ஏற்படுத்தியுள்ளது.

இந்த சூழலில், இந்திய யூனியன் முஸ்லிம் லீக் கட்சி தவெக அமைச்சரவையில் இடம்பெறும் என அறிவித்த நிலையில், அமைச்சர் பதவிகளில் ஒன்று IUML கட்சிக்கு என உறுதியாகியுள்ளது. மீதமுள்ள ஒரு அமைச்சர் பதவி விசிகவுக்கு ஒதுக்கப்பட வாய்ப்புள்ளதாக தகவல்கள் வெளியாகியுள்ளன. கூட்டணி கட்சிகளிடையே சமநிலையை பேணி, அரசியல் ஸ்திரத்தன்மையை உறுதி செய்யும் வகையில் முதலமைச்சர் விஜய் முடிவெடுப்பதாக அரசியல் பார்வையாளர்கள் மதிப்பிடுகின்றனர்.

இந்த அமைச்சரவை விரிவாக்கம் தவெக அரசின் கூட்டணி உறவுகளை வலுப்படுத்தும் என்றும், ஆனால் அ.தி.மு.க. உள்ளிட்ட எதிர்க்கட்சிகளிடையே புதிய விவாதங்களை ஏற்படுத்தும் என்றும் அரசியல் வட்டாரங்கள் கருதுகின்றன. மொத்தத்தில், 33 அமைச்சர்களுடன் செயல்படத் தொடங்கியுள்ள புதிய அரசு, மீதமுள்ள இரு இடங்களை நிரப்பி முழு பலத்துடன் செயல்படும் என எதிர்பார்க்கப்படுகிறது.