கொலம்பியா நாட்டில் நிகழ்ந்த கோரமான ராணுவ விமான விபத்து உலகையே உலுக்கியுள்ளது. புவேர்ட்டோ லெகுய்சாமோ (Puerto Leguízamo) விமான நிலையத்திலிருந்து சுமார் 110 ராணுவ வீரர்கள் என மொத்த 125 பேருடன் புறப்பட்ட அந்த விமானம், புறப்பட்ட சில நிமிடங்களிலேயே கட்டுப்பாட்டை இழந்து கீழே விழுந்து நொறுங்கியது. விழுந்த வேகத்தில் விமானம் பயங்கர சத்தத்துடன் வெடித்துச் சிதறியதால், அப்பகுதியே போர்க்களம் போலக் காட்சியளித்தது. இந்த விபத்தில் இதுவரை 66 வீரர்கள் உடல் கருகி பரிதாபமாக உயிரிழந்துள்ளதாக அதிகாரப்பூர்வ தகவல்கள் தெரிவிக்கின்றன.
விபத்து நடந்தவுடன் அங்கு விரைந்த மீட்புக் குழுவினர், பற்றி எரிந்த விமான இடிபாடுகளுக்குள் சிக்கியிருந்த வீரர்களை மீட்கும் பணியில் ஈடுபட்டனர். மீட்கப்பட்ட பல வீரர்கள் பலத்த தீக்காயங்களுடன் அருகில் உள்ள ராணுவ மருத்துவமனைகளில் அனுமதிக்கப்பட்டுள்ளனர். அவர்களில் பலருடைய நிலைமை மிகவும் கவலைக்கிடமாக இருப்பதால், உயிரிழப்பு எண்ணிக்கை இன்னும் அதிகரிக்கக்கூடும் என்ற அச்சம் நிலவுகிறது. முதற்கட்ட விசாரணையில், இயந்திரக் கோளாறு காரணமாக இந்த விபத்து நடந்திருக்கலாம் என்று சந்தேகிக்கப்படுகிறது, இருப்பினும் விரிவான விசாரணைக்கு அந்நாட்டு அரசு உத்தரவிட்டுள்ளது.
பெரு நாட்டின் எல்லைப் பகுதியில் அமைந்துள்ள பியூர்டோ லெகுயிசாமோ என்ற இடத்திலிருந்து ராணுவ வீரர்களை ஏற்றிக்கொண்டு ‘லாக்ஹீட் மார்ட்டின்’ நிறுவனத்தின் ஹெர்குலஸ் C-130 ரக விமானம் புறப்பட்டது. இதுகுறித்து அந்நாட்டு பாதுகாப்பு அமைச்சர் பெட்ரோ சான்செஸ் தனது எக்ஸ் தளத்தில், எமது விமானப்படைக்குச் சொந்தமான ஹெர்குலஸ் விமானம், ராணுவ வீரர்களை ஏற்றிச் சென்றபோது விபத்துக்குள்ளானது என்பதை ஆழ்ந்த வருத்தத்துடன் தெரிவித்துக் கொள்கிறேன். மீட்புப் படையினர் ஏற்கனவே அவ்விடத்திற்கு விரைந்துள்ளனர்.
ஓடுதளத்திலிருந்து புறப்பட்ட ஒன்றரை கிலோமீட்டர் தொலைவிலேயே விமானம் தரையில் மோதி விபத்துக்குள்ளானது. விபத்தின் போது விமானத்தில் ஏற்பட்ட தீ விபத்தால், அதில் கொண்டு செல்லப்பட்ட வெடிமருந்துகள் வெடித்துச் சிதறின. இதனால் சேதம் அதிகரித்ததாகத் தெரிவிக்கப்பட்டுள்ளது. சட்டவிரோத ஆயுதக் குழுக்களால் இந்தத் தாக்குதல் நடத்தப்பட்டதற்கான எந்த அறிகுறியும் இல்லை என்றும், அனுபவம் வாய்ந்த விமானிகளால் நல்ல நிலையில் இருந்த விமானமே இயக்கப்பட்டது என்றும் அமைச்சர் சான்செஸ் உறுதிப்படுத்தியுள்ளார்.
