இஸ்ரேல் பிரதமர் பெஞ்சமின் நெதன்யாகு அழைப்பின் பேரில், பிரதமர் நரேந்திர மோடி இன்று இரண்டு நாள் அரசு முறை பயணமாக இஸ்ரேல் சென்றடைந்தார். இன்று புதன்கிழமை (பிப்ரவரி 25) காலை இஸ்ரேலுக்குப் புறப்பட்டு மாலை 4:30 மணியளவில் டெல் அவிவ் சென்றடைந்தார். அங்கு அவரை இஸ்ரேல் பிரதமர் பெஞ்சமின் நெதன்யாகு அன்புடன் வரவேற்றார். தனது பயணத்தின் போது, பிரதமர் மோடி இஸ்ரேல் பிரதமர் பெஞ்சமின் நெதன்யாகுவுடன் கலந்துரையாடுவார். இஸ்ரேல் நாடாளுமன்றத்திலும் உரையாற்றுவார், இஸ்ரேல் நாடாளுமன்றத்தில் உரை நிகழ்த்தும் முதல் இந்தியப் பிரதமர் என்ற பெருமையைப் பெறுவார். இந்திய புலம்பெயர்ந்தவர்களுடனும் அவர் கலந்துரையாடுவார்.
பிரதமர் மோடியின் விமானம் பாகிஸ்தான் மற்றும் ஈரானின் வான்வெளியைத் தவிர்த்தது. அவரது விமானம் டெல்லியில் இருந்து குஜராத் வழியாக அரேபியக் கடலைக் கடந்து ஓமானுக்குள் சென்றது. பின்னர் அது சவுதி அரேபிய வான்வெளியைக் கடந்து ஜோர்டானுக்குள் நுழைந்தது. ஜோர்டானுக்குப் பிறகு, இஸ்ரேலிய எல்லை தொட்டது. பிரதமர் மோடி இந்திய அரசாங்கத்தின் சிறப்பு விமானமான ஏர் இந்தியா ஒன்னில் இஸ்ரேலுக்குப் பயணம் செய்தார். பிரதமர் மோடியின் இஸ்ரேல் பயணத்தை உலகமே கவனித்துக் கொண்டிருக்கிறது.
இந்தியா – இஸ்ரேல் இடையே நீண்ட காலமாக நிலுவையில் உள்ள வர்த்தக ஒப்பந்தத்தை இறுதி செய்வது இந்த பயணத்தின் முக்கிய அம்சமாக பார்க்கப்படுகிறது. இரு தரப்பும் பல முக்கிய புரிந்துணர்வு ஒப்பந்தங்களில் கையெழுத்திட உள்ளதாக தகவல்கள் தெரிவிக்கின்றன.
2017ஆம் ஆண்டு இஸ்ரேல் சென்ற முதல் இந்திய பிரதமர் என்ற பெருமையை மோடி பெற்றிருந்தார். அதற்கு பிறகு சுமார் 9 ஆண்டுகள் கழித்து நடைபெறும் இந்த பயணம் சர்வதேச அளவில் முக்கியத்துவம் பெறுகிறது. இஸ்ரேல் பார்லிமென்டிலும் பிரதமர் மோடி உரையாற்ற உள்ளார்.
