லார்ட்ஸில் வரலாறு படைத்த இந்திய மகளிர் அணி… முதல் டெஸ்டிலேயே இங்கிலாந்தை வீழ்த்தியது!

கிரிக்கெட்டின் மெக்கா என போற்றப்படும் லார்ட்ஸ் மைதானத்தில் நடைபெற்ற முதல் மகளிர் டெஸ்ட் போட்டியில், இந்திய மகளிர் அணி வரலாற்றுச் சாதனை படைத்துள்ளது.

இங்கிலாந்தை 270 ரன்கள் வித்தியாசத்தில் வீழ்த்தி, லார்ட்ஸில் டெஸ்ட் வென்ற முதல் மகளிர் அணியாக இந்தியா முத்திரை பதித்தது.

முதலில் பேட் செய்த இந்தியா, முதல் இன்னிங்சில் 285 ரன்கள் குவித்தது. இதில் ஸ்மிருதி மந்தனா 83, ஹர்மன்பிரீத் கவுர் 58, தீப்தி சர்மா 57 ரன்கள் எடுத்தனர்.

பின்னர் களமிறங்கிய இங்கிலாந்தை, இந்திய வேகப்பந்து வீச்சாளர் கிராந்தி கவுட் அபாரமாக பந்துவீசி 5 விக்கெட்டுகளை 37 ரன்களுக்கு வீழ்த்தினார். இதனால் இங்கிலாந்து 170 ரன்களுக்கு சுருண்டது.

115 ரன்கள் முன்னிலையுடன் இரண்டாவது இன்னிங்சை தொடங்கிய இந்தியா, 341/7 ரன்களில் டிக்ளேர் செய்தது. இதில் யாஸ்திகா பாட்டியா 113 ரன்கள் குவித்து, லார்ட்ஸ் மகளிர் டெஸ்ட் வரலாற்றில் சதம் அடித்த முதல் வீராங்கனை என்ற பெருமையை பெற்றார். மேலும், ஸ்மிருதி மந்தனா 70, ரிச்சா கோஷ் 50 ரன்கள் சேர்த்தனர்.

457 ரன்கள் என்ற இமாலய இலக்குடன் களமிறங்கிய இங்கிலாந்து, இந்திய பந்துவீச்சை சமாளிக்க முடியாமல் 186 ரன்களுக்கு ஆல் அவுட்டானது. ஸ்நே ராணா 4 விக்கெட்டுகளையும், கிராந்தி கவுட், தீப்தி சர்மா தலா 2 விக்கெட்டுகளையும் கைப்பற்றினர்.

இந்த வெற்றியின் மூலம், இங்கிலாந்தில் இந்திய மகளிர் அணி இதுவரை விளையாடிய 10 டெஸ்ட் போட்டிகளில் 3 வெற்றி, 7 டிரா என்ற தோல்வியறியா சாதனையைத் தொடர்கிறது. மேலும், கடந்த 5 டெஸ்ட் போட்டிகளில் இந்தியாவின் 4-வது வெற்றி இதுவாகும்.