நேற்றைய ஐபிஎல் போட்டியில் டெல்லி அணிக்கு எதிரான இமாலய இலக்கை எட்டிப்பிடித்தது எப்படி என பஞ்சாப் அணி கேப்டன் ஸ்ரேயஸ் ஐயர் தனது கருத்தை தெரிவித்துள்ளார்.
ஐபிஎல் வரலாற்றில் மிகப்பிரம்மாண்டமான ரன் சேஸிங்காக பார்க்கப்படும் நேற்றைய டெல்லி அணிக்கு எதிரான போட்டியில், பஞ்சாப் அணி வியக்கத்தக்க வெற்றியைப் பதிவு செய்துள்ளது. முதலில் பேட்டிங் செய்த டெல்லி அணி 2 விக்கெட் இழப்பிற்கு 264 ரன்கள் என்ற இமாலய இலக்கை நிர்ணயித்தது. இவ்வளவு பெரிய ஸ்கோரைத் துரத்துவது சாத்தியமா என்ற கேள்வி எழுந்த நிலையில், பஞ்சாப் அணி 18.5 ஓவர்களிலேயே 4 விக்கெட்டுகளை மட்டும் இழந்து 265 ரன்கள் எடுத்து 6 விக்கெட் வித்தியாசத்தில் புதிய உலக சாதனை படைத்தது. இந்த அசாத்திய வெற்றியில் கடைசி வரை ஆட்டமிழக்காமல் 71 ரன்கள் குவித்து கேப்டன் ஸ்ரேயஸ் ஐயர் முக்கியப் பங்கு வகித்தார்.
வெற்றி குறித்துப் பேசிய ஸ்ரேயஸ் ஐயர், “சொல்ல வார்த்தைகளே இல்லை” என்று நெகிழ்ச்சியுடன் தெரிவித்தார். மைதானத்தில் நிலவிய கடும் வெயிலும், எதிரணியின் அதிரடி ஆட்டமும் பந்துவீச்சாளர்களுக்குப் பெரும் சவாலாக இருந்ததாகக் கூறினார். ஆடுகளம் பந்துவீச்சுக்கு ஒத்துழைக்கும் என எதிர்பார்த்த நிலையில், அது பேட்டிங்கிற்குச் சாதகமாக அமைந்தது. குறிப்பாக, எதிரணி வீரர் கே.எல். ராகுலின் நிதானமான அதிரடி ஆட்டத்தைப் பார்த்தபோது, “அவர்களால் இவ்வளவு ரன்கள் எடுக்க முடிகிறது என்றால், நம்மாலும் நிச்சயமாக முடியும்” என்ற நம்பிக்கை தனக்குள் இருந்ததாக ஐயர் குறிப்பிட்டார்.
பேட்டிங் இறங்குவதற்கு முன்பாகவே அணி வீரர்களிடம், “இலக்கு எவ்வளவு ரன்களாக இருந்தாலும், அதைவிட ஒரு ரன் கூடுதலாக எடுப்பதே நமது இலக்கு” என்று கூறி உற்சாகப்படுத்தியதாக அவர் தெரிவித்தார். ஏற்கனவே 220 ரன்கள் இலக்கை இரு ஓவர்கள் மீதமிருக்கும் போதே எட்டிய அனுபவம் தங்களுக்கு இருந்ததால், அதே துணிச்சலுடன் களமிறங்கியதாகக் கூறினார். தொடக்க வீரர்கள் கொடுத்த சிறப்பான அடித்தளத்தை கச்சிதமாகப் பயன்படுத்திக் கொண்டதே இந்த இமாலய வெற்றியை எளிதாக்கியது என ஸ்ரேயஸ் ஐயர் மனநிறைவுடன் தெரிவித்தார்.
