சீனாவின் மிகப்பெரிய ஆன்லைன் பயண முன்பதிவு நிறுவனமான Trip.com Group மீது, சந்தை ஆதிக்கத்தை தவறாக பயன்படுத்தியதாகக் கூறி, சீனாவின் State Administration for Market Regulation (SAMR) மொத்தம் 5.2 பில்லியன் யுவான் (சுமார் 770 மில்லியன் அமெரிக்க டாலர்) அபராதம் விதித்துள்ளது.
SAMR வெளியிட்டுள்ள அறிக்கையின்படி, Trip.com தனது இணைய தளத்தில் ஹோட்டல்களுக்கு வழங்கப்படும் டிராஃபிக் ஒதுக்கீடு (Traffic Allocation), பிளாட்ஃபார்ம் விதிமுறைகள் மற்றும் தொழில்நுட்ப கட்டுப்பாடுகள் ஆகியவற்றை பயன்படுத்தி, சில ஹோட்டல்களுடன் பிரத்யேக (Exclusive) ஒப்பந்தங்களை செய்து, பிற ஆன்லைன் தளங்களில் அவர்கள் செயல்படுவதை கட்டுப்படுத்தியதாக குற்றம்சாட்டப்பட்டுள்ளது. இதன் மூலம் குறைந்த விலையை வழங்கும் பெயரில் சந்தைப் போட்டியை பாதித்ததாகவும் தெரிவிக்கப்பட்டுள்ளது.
இந்த வழக்கில், நிறுவனத்திடம் இருந்து 1.66 பில்லியன் யுவான் சட்டவிரோத வருவாய் பறிமுதல் செய்யப்பட்டதுடன், கூடுதலாக 3.52 பில்லியன் யுவான் அபராதமும் விதிக்கப்பட்டுள்ளது.
மேலும், ஹோட்டல் உரிமையாளர்களிடம் இருந்து பிடித்து வைக்கப்பட்டதாகக் கூறப்படும் 122 மில்லியன் யுவான் முன்பதிவு டெபாசிட் தொகையை உடனடியாக திருப்பி வழங்கவும் SAMR உத்தரவிட்டுள்ளது.
Trip.com நிறுவனத்தின் கீழ் Ctrip, Skyscanner, Qunar உள்ளிட்ட பயண முன்பதிவு சேவைகள் செயல்பட்டு வருகின்றன. இந்த விவகாரம் குறித்து Trip.com நிறுவனத்தின் தலைமை நிர்வாக அதிகாரி ஜேன் சன் (Jane Sun) வெளியிட்டுள்ள அறிக்கையில், “அரசின் தீர்ப்பை முழுமையாக ஏற்றுக்கொள்கிறோம். ஒழுங்குமுறை அமைப்பு வழங்கிய அனைத்து திருத்த நடவடிக்கைகளையும் முழுமையாக நடைமுறைப்படுத்துவோம்” என்று தெரிவித்துள்ளார்.
கடந்த ஜனவரி மாதம், ஹோட்டல்களுக்கு நியாயமற்ற நிபந்தனைகள் விதித்தது மற்றும் விலைகளை கட்டுப்படுத்தியதாக எழுந்த புகார்களின் அடிப்படையில் Trip.com மீது சீன அரசு போட்டியியல் (Antitrust) விசாரணையை தொடங்கியது.
இணைய தள நிறுவனங்களின் ஆதிக்கம், நியாயமற்ற போட்டி மற்றும் அதிகப்படியான விலைப் போட்டியை கட்டுப்படுத்தும் நடவடிக்கைகளின் ஒரு பகுதியாக இந்த அபராதம் விதிக்கப்பட்டுள்ளதாக சீன அதிகாரிகள் தெரிவித்துள்ளனர். இணைய சந்தையில் சமநிலையான போட்டி சூழலை உருவாக்கவும், நுகர்வோர் மற்றும் ஹோட்டல் தொழில்துறையின் நலனை பாதுகாக்கவும் இந்த நடவடிக்கை எடுக்கப்பட்டுள்ளதாக SAMR விளக்கியுள்ளது.
