கார் ரேசர் என்பதை தாண்டி கிரிக்கெட்டிலும் மாஸ் காட்டும் அஜித்… திருமண நாள், பிறந்தநாள் கொண்டாட்டங்களை மனைவி, மகன், மகளுடன் கொண்டாடிய வீடியோ சமூக வலைத்தளங்களில் வைரலானது.
தமிழ் சினிமாவின் முன்னணி நடிகரும், பல்வேறு சர்வதேச விருதுகளை குவித்த கார் பந்தய வீரருமான அஜித்குமார், தனது பன்முகத் திறமைகளை மீண்டும் ஒருமுறை நிரூபித்துள்ளார். சமீபத்தில் வெளியான ‘குட் பேட் அக்லி’ படத்திற்குப் பிறகு, அவர் மீண்டும் இளம் இயக்குநர் ஆதிக் ரவிச்சந்திரன் இயக்கத்தில் புதிய படத்தில் நடிக்கவிருப்பதாக தகவல்கள் வெளியாகியுள்ளன. இந்தப் படத்தின் மூலம் அஜித் ரசிகர்களுக்கு மீண்டும் ஒரு பரபரப்பான அனுபவத்தைத் தருவார் என எதிர்பார்க்கப்படுகிறது.
இதனிடையே, நடிகர் என்னும் அடையாளத்தைத் தாண்டி அஜித்குமார் தயாரிப்பாளராகவும் அடியெடுத்து வைத்துள்ளார். ‘அஜித்குமார் ஸ்போர்ட்ஸ் சர்வீஸ் எல்.எல்.சி.’ என்ற பெயரில் ஒரு புதிய நிறுவனத்தை தென்னிந்திய திரைப்பட வர்த்தக சபையில் (பிலிம் சேம்பர்) பதிவு செய்துள்ளார். விளையாட்டு தொடர்பான நடவடிக்கைகளை ஊக்குவிக்கும் நோக்கில் இந்த நிறுவனம் செயல்படும் என்று கூறப்படுகிறது. சர்வதேச கார் பந்தயங்களில் பங்கேற்று உலக அரங்கில் தனது திறமையை நிலைநாட்டி வந்த அஜித், தமிழக சட்டமன்றத் தேர்தலில் ஜனநாயகக் கடமையை நிறைவேற்றுவதற்காக சென்னை திரும்பினார்.
வெளிநாட்டில் இருந்து திரும்பிய அவர், தனது மனைவி ஷாலினி, மகன் ஆத்விக் மற்றும் மகள் அனோஷ்கா ஆகியோருடன் திருமண நாள் மற்றும் பிறந்தநாள் கொண்டாட்டங்களை மகிழ்ச்சியாகக் கழித்தார். அந்த குடும்ப புகைப்படங்கள் மற்றும் வீடியோக்கள் சமூக வலைத்தளங்களில் பெரும் வரவேற்பைப் பெற்றன.
இந்நிலையில், அஜித்குமார் கிரிக்கெட் விளையாடும் புதிய வீடியோ ஒன்று இணையத்தில் வைரலாகி வருகிறது. விக்கெட் கீப்பிங் செய்து, பேட்டிங் செய்து, முழு ஈடுபாட்டுடன் ஆட்டத்தில் ஈடுபடும் அஜித்தின் தோற்றம் ரசிகர்களை மெய்சிலிர்க்க வைத்துள்ளது. இந்த வீடியோ மூலம், அவர் ஒரு திறமையான கார் பந்தய வீரர் மட்டுமல்ல, கிரிக்கெட்டிலும் சிறப்பான ஆர்வமும் திறமையும் கொண்டவர் என்பதை உணர்த்தியுள்ளார்.
அஜித் ரசிகர்கள் இந்த வீடியோவை தொடர்ந்து பகிர்ந்து வருகின்றனர். “தல அஜித் எல்லாத்திலும் சூப்பர்” என்ற கருத்துக்கள் சமூக ஊடகங்களில் நிறைந்துள்ளன. திரைப்படம், விளையாட்டு, குடும்பம் என பல்வேறு துறைகளில் சமநிலை பேணி வரும் அஜித்குமாரின் இந்தப் பன்முக ஆளுமை ரசிகர்களிடையே பெரும் மதிப்பைப் பெற்றுள்ளது.
