“குழந்தை தொழிலாளர் இல்லா தமிழ்நாடு” இலக்கை நோக்கி செயல்படுவோம் – முதல்வர் விஜய்..!!

கல்வி அளித்து குழந்தைகளின் வாழ்வை ஒளிரச் செய்வோம் என்று முதலமைச்சர் விஜய் தெரிவித்துள்ளார்.

உலகெங்கும் குழந்தை தொழிலாளர் முறைக்கு எதிராக விழிப்புணர்வை ஏற்படுத்தும் வகையில் ஐக்கிய நாடுகள் சபையால் அங்கீகரிக்கப்பட்ட ஜூன் 12 குழந்தைத் தொழிலாளர் எதிர்ப்பு தினம் இன்று கடைபிடிக்கப்படுகிறது. இந்த ஆண்டு உலகளாவிய கருப்பொருள் “குழந்தைத் தொழிலாளருக்கு ரெட் கார்டு: குழந்தைகளுக்கு நியாயமான விளையாட்டு, பெரியவர்களுக்கு தகுதியான வேலை” என்பதாகும். இதனை முன்னிட்டு தமிழ்நாடு முதலமைச்சர் விஜய் வெளியிட்ட அறிக்கையில், குழந்தைகளின் கல்வி உரிமை மற்றும் பாதுகாப்பை உறுதி செய்ய வலியுறுத்தியுள்ளார்.

“குழந்தைப் பருவம் என்பது துள்ளித் திரிந்து விளையாடி, பள்ளிக்குச் சென்று கல்வி பயிலும் இனிய பருவம்” என்று அவர் தனது அறிக்கையில் குறிப்பிட்டுள்ளார். பல்வேறு குடும்பச் சூழ்நிலைகளால் குழந்தைகள் வேலைக்கு அனுப்பப்படுவதைத் தடுத்து, அவர்களுக்கு மகிழ்ச்சியான குழந்தைப் பருவத்தையும் தரமான கல்வியையும் வழங்குவது அனைவரின் கடமை என்று வலியுறுத்தினார். ஒவ்வொரு குழந்தைக்கும் சுதந்திரமாக வாழும் உரிமை, பாதுகாப்பு உரிமை மற்றும் கல்வி உரிமை அடிப்படைத் தேவைகளாகும். இவற்றை மறுப்பது இயற்கை நியதிக்கும், சமூக நீதிக்கும் எதிரானது என்று முதலமைச்சர் விஜய் தெரிவித்தார்.

குழந்தைகளை எந்த வகையான தொழிலிலும் ஈடுபடுத்தக் கூடாது. குறிப்பாக வளரிளம் பருவத்தினரை ஆபத்தான தொழில்களில் பணியமர்த்துவதை முற்றிலும் தவிர்க்க வேண்டும் என்றார். தமிழ்நாடு அரசு குழந்தைத் தொழிலாளர் முறையை ஒழிப்பதை முக்கிய நோக்கமாகக் கொண்டு செயல்பட்டு வருகிறது. குழந்தைகளின் உரிமைகளைப் பாதுகாத்து, அவர்களுக்கு தரமான கல்வி அளித்து, மகிழ்ச்சியான எதிர்காலத்தை உருவாக்கும் திட்டங்களைத் தீவிரமாக நடைமுறைப்படுத்தி வருகிறது. பல்வேறு முனைப்பான திட்டங்கள் மூலம் குழந்தைகளை பள்ளிக்கு கொண்டு வருதல், பெற்றோருக்கு விழிப்புணர்வு ஏற்படுத்துதல், தொழிலாளர் துறை மூலமான கண்காணிப்பு ஆகியவை இதில் அடங்கும்.

குழந்தைத் தொழிலாளர்களின் உழைப்பால் கிடைக்கும் வருமானம் குடும்பத்துக்கும் நாட்டுக்கும் நீண்டகாலத்தில் சிறுமையைத் தரும் என்ற உண்மையை சமூகமும் பெற்றோர்களும் உணர வேண்டும் என்று அவர் வேண்டுகோள் விடுத்தார். அரசின் முயற்சிகளுக்கு முழு ஒத்துழைப்பு அளித்து, குழந்தைத் தொழிலாளர் இல்லாத மாநிலமாக தமிழ்நாட்டை உருவாக்குவோம் என்று அழைப்பு விடுத்தார்.“குழந்தைத் தொழிலாளர் முறையைத் தகர்ப்போம்! கல்வி அளித்து குழந்தைகளின் வாழ்வை ஒளிரச் செய்வோம்!” என்று முதலமைச்சர் விஜய் தனது அறிக்கையில் உறுதியுடன் கூறியுள்ளார்.

உலகளவில் இன்னும் பல லட்சம் குழந்தைகள் தொழிலாளர் சுரண்டலுக்கு ஆளாகும் நிலையில், இத்தகைய அரசு முனைப்புகள் முக்கியத்துவம் பெறுகின்றன. தமிழ்நாட்டில் கல்வி உரிமைச் சட்டம், மத்திய-மாநில அரசுகளின் திட்டங்கள் ஆகியவற்றின் மூலம் குழந்தைகளின் எதிர்காலத்தைப் பாதுகாக்கும் பணி தொடர்ந்து வலுப்பெற வேண்டும். இந்த தினம் குழந்தைகளின் உரிமைகளைப் பாதுகாக்கும் உறுதிப்பாட்டை மீண்டும் நினைவூட்டுகிறது.