காலங்கள் மாறலாம்… தலைமுறைகள் கடக்கலாம்… ஆனால், ஒரு சில பெயர்கள் மட்டும்தான் சரித்திரத்தின் பக்கங்களில் நிரந்தரமாக செதுக்கப்படும். 2024 யூரோ தொடரோடு சர்வதேச கால்பந்துக்கு விடை கொடுத்தார். ‘அவர் கதை முடிந்தது’ என்றார்கள் பலர். ஆனால், சிங்கம் எப்போதும் நிரந்தரமாக ஓய்வெடுப்பதில்லை! இரண்டு வருட இடைவெளிக்குப் பிறகு, மீண்டும் ஜெர்மனி ஜெர்சியில் வலம் வந்து, உலகக் கோப்பை வரலாற்றையே மாற்றி எழுதியிருக்கிறார் மானுவல் நோயர்.
நேற்று ஞாயிற்றுக்கிழமை ஹூஸ்டனின் NRG மைதானத்தில் குராசாவ் அணிக்கு எதிரான போட்டியில் , 40 வயதான நோயர், ஜெர்மனியின் தொடக்க லெவனில் களமிறங்கிய அந்த நிமிடம்… உலகமே எழுந்து நின்று கைதட்டியது. 2010, 2014, 2018, 2022… இப்போது 2026 என முழுமையாக ஐந்து வெவ்வேறு உலகக் கோப்பை தொடர்களில் களம் கண்ட உலகின் இரண்டாவது கோல்கீப்பர் என்ற அசாத்திய சாதனையை தன்வசப்படுத்தியுள்ளார் நோயர்.
மெக்சிகோவின் ஆண்டோனியோ கபர்ஜாலுக்குப் பிறகு, சரியாக 60 ஆண்டுகள் கழித்து இந்த அரிய சாதனையை ஒரு கோல்கீப்பர் நிகழ்த்திக் காட்டியிருக்கிறார் என்றால், இது சாதாரண சாதனை அல்ல, அசாத்திய சாதனையாக பார்க்கப்படுகிறது.
பஃபன், காஸிலாஸ், ஒச்சோவா எனப் பல ஜாம்பவான்கள் உலகக் கோப்பை ஸ்குவாடில் இருந்திருக்கலாம். ஆனால், ஐந்து உலகக் கோப்பைகளிலும் மைதானத்திற்குள் இறங்கி, கோல் போஸ்ட்டை மிரட்டிய பெருமை, நோயருக்கு மட்டுமே சாத்தியமாகியிருக்கிறது.
போட்டி தொடங்கிய 21-வது நிமிடத்தில், குராசாவ் அணி, திடீரென ஒரு கோல் அடித்து, நோயருக்கு ஒரு சின்ன அதிர்ச்சி கொடுத்தார்கள். ‘ஐயோ, கிளீன் ஷீட், அதாவது எதிரணியை கோல் அடிக்கவிடாமல் நோயரால் தடுக்கமுடியவில்லையே என்று ரசிகர்கள் வருத்தமடைந்தனர்.
ஆனா… நம்ம ஜெர்மனி டீம் சும்மா விடுமா என்ன? ‘எங்க அண்ணன் வரலாற்று சாதனை படைச்ச நாள் இன்னைக்கு… சும்மா விடமாட்டோம்’ அப்படின்னு வெறித்தனமா விளையாட ஆரம்பிச்சாங்க! அடுத்தடுத்து கோல் மழை பொழிஞ்சு, 7-க்கு 1 என்ற கணக்குல குராசாவ் அணியை துவம்சம் பண்ணிட்டாங்க. நோயரின் இந்த வரலாற்று சாதனையை, ஒரு மரண மாஸ் வெற்றியோட கொண்டாடி முடிச்சிருக்கு ஜெர்மன் படை.
இவரின் சாதனை வேட்டை இதோட முடியல, உலகக்கோப்பை வரலாற்றிலேயே இதுவரைக்கும் 20 மேட்ச் விளையாடி, பிரான்ஸ் நாட்டோட முன்னாள் கேப்டன் ஹியூகோ லோரிஸ்-ஓட உலக சாதனையை, தற்போது நோயர் சமன் செய்து அசத்தியுள்ளார்.
இன்னும் ஒரே ஒரு மேட்ச் விளையாடினா போதும்… உலகக்கோப்பையில் அதிக மேட்ச் விளையாடிய கோல்கீப்பர் என்ற உலக சாதனையை நோயர் தனியொருவனாக முறியடிப்பார். அதுமட்டும் இல்லாம, இன்னும் சில போட்டிகளில் கோல் எதுவும் வாங்காம ‘கிளீன் ஷீட்’ பண்ணிட்டா… ஃபேபியன் பார்தேஸ், பீட்டர் ஷில்டன் உள்ளிட்ட கால்பந்து உலகத்தோட பழைய சாதனைகள் எல்லாம் சுக்குநூறா உடைஞ்சுடும். மொத்த உலகக்கோப்பை வரலாற்றுலயே ‘தி கிரேட்டஸ்ட் கோல்கீப்பர்’ என்ற சாதனையை பெறுவார்.
