தமிழகத்தில் அண்மையில் நடைபெற்ற சட்டமன்றத் தேர்தலுக்குப் பிந்தைய அரசியல் சூழலில் பல்வேறு அதிரடி மாற்றங்கள் நிகழ்ந்து வரும் நிலையில், விடுதலைச் சிறுத்தைகள் கட்சியின் செங்கல்பட்டு மாவட்டச் செயற்குழு கூட்டம் சிங்கபெருமாள் கோவில் அருகே உள்ள ஒரு தனியார் திருமண மண்டபத்தில் சனிக்கிழமை அன்று நடைபெற்றது.
மாவட்டச் செயலாளர் கேது என்கிறதென்னவன் தலைமையில் நடைபெற்ற இக்கூட்டத்தில், தலைமையகச் செயலாளர் தகடூர் தமிழ்ச்செல்வன் சிறப்பு அழைப்பாளராகக் கலந்துகொண்டு கட்சி நிர்வாகிகளிடையே உரையாற்றினார்.
தவெகவுக்கு ஆதரவு… திருமாவளவனுக்குப் பாராட்டு
இந்த மாநாட்டில், பல்வேறு முக்கியத்துவம் வாய்ந்த தீர்மானங்கள் ஒருமனதாக நிறைவேற்றப்பட்டன. குறிப்பாக, அண்மையில் நடந்த தேர்தலில் தமிழக வெற்றிக் கழகம் (த.வெ.க) தனிப் பெரும்பான்மை பெறாத நிலையிலும், மாநிலத்தில் ஒரு நிலையான ஆட்சி அமைய வேண்டும் என்ற நோக்கில் தவெக ஆட்சி அமைக்க விசிக தலைவர் தொல். திருமாவளவன் ஆதரவுக்கரம் நீட்டியதற்கு மாவட்டச் செயற்குழு தனது முழுமையான ஆதரவையும் பாராட்டுகளையும் தெரிவித்துத் தீர்மானம் நிறைவேற்றியது. பல தசாப்தங்களாகத் திராவிடக் கட்சிகளின் கூட்டணியில் ஜூனியர் பார்ட்னராக மட்டுமே இருந்து வந்த விசிக, தற்போது தவெக அரசு அமைவதற்கு மிக முக்கியக் காரணியாக மாறி, ஆட்சியில் தங்களது அரசியல் செல்வாக்கை நிலைநிறுத்தியுள்ளதை விசிக தொண்டர்கள் இத்தீர்மானத்தின் மூலம் வரவேற்றுள்ளனர்.
8 தலித் அமைச்சர்கள்
இதனைத் தொடர்ந்து, தவெக தலைவரும் தமிழக முதலமைச்சருமான சி. ஜோசப் விஜய் தலைமையிலான புதிய அமைச்சரவையில் தலித் சமூகத்தைச் சேர்ந்த 8 பேருக்கு மிகவும் முக்கியத்துவம் வாய்ந்த துறைகளை வழங்கி அமைச்சர்களாகப் பொறுப்பேற்கச் செய்ததற்கு, முதலமைச்சருக்கு விசிக மாவட்டச் செயற்குழு தனது மனமார்ந்த நன்றியையும் பாராட்டுகளையும் தெரிவித்துக் கொண்டது. தமிழக அரசியல் வரலாற்றில் இதற்கு முன்பு தலித் சமூகத்தைச் சேர்ந்த அமைச்சர்களுக்கு ஆதிதிராவிடர் நலத்துறை அல்லது வீட்டுவசதித் துறை போன்ற குறிப்பிட்ட சில துறைகள் மட்டுமே ஒதுக்கப்பட்டு வந்த நிலையில், தற்போதைய விஜய் தலைமையிலான அரசு அவர்களுக்குப் பவர்ஃபுல் ஆன வளர்ச்சி மற்றும் உள்கட்டமைப்பு சார்ந்த முக்கியத் துறைகளை வழங்கியுள்ளது.
அதிகாரப் பகிர்வு கொள்கைக்காகத் தொடர்ந்து போராடி வரும் விடுதலைச் சிறுத்தைகள் கட்சி, முதலமைச்சர் விஜய்யின் இந்த அதிரடி சமூக நீதி நடவடிக்கையைத் தங்களது நீண்ட நாள் போராட்டத்திற்குக் கிடைத்த ஒரு தார்மீக வெற்றியாகக் கருதி இத்தீர்மானத்தை நிறைவேற்றியுள்ளது.
புதிய அரசியல் பயணம்
மேலும், ஜூன் 14 அன்று சென்னையில் நடைபெறத் திட்டமிடப்பட்டுள்ள விசிக விருதுகள் வழங்கும் விழா மற்றும் மாநில மாநாட்டில் செங்கல்பட்டு மாவட்டத்தைச் சேர்ந்த கட்சி நிர்வாகிகள், தொண்டர்கள் மற்றும் பொதுமக்கள் என 5,000-க்கும் மேற்பட்டோரைப் பெருந்திரளாகக் திரட்டிப் பங்கேற்கச் செய்வது என்றும், இதற்காக மாவட்டம் முழுவதும் சுவர் விளம்பரங்கள், பேனர்கள் மற்றும் அடிமட்ட அளவிலான பிரச்சாரங்களை தீவிரப்படுத்துவது என்றும் மற்றொரு தீர்மானத்தில் முடிவு செய்யப்பட்டது.
இவற்றுடன், அண்டை மாநிலங்களான ஆந்திரப் பிரதேசம் (விஜயவாடா) மற்றும் தெலங்கானா (ஹைதராபாத்) ஆகிய மாநிலங்களில் நிறுவப்பட்டுள்ளது போல, சமூக நீதி மற்றும் இந்திய அரசியலமைப்பின் சட்டமேதை டாக்டர் பி.ஆர். அம்பேத்கருக்குத் தமிழகத்திலும் 125 அடி உயரத்தில் பிரம்மாண்ட வெண்கலச் சிலை ஒன்றை மாநில அரசு உடனடியாக நிறுவ வேண்டும் என்றும் தமிழக அரசுக்குக் கோரிக்கை விடுத்து தீர்மானம் நிறைவேற்றப்பட்டது.
இந்தத் தீர்மானங்களின் வாயிலாக, த.வெ.க-வுடனான தங்களது கூட்டணி என்பது வெறும் ஆட்சி அமைப்பதற்கான தற்காலிக ஒப்பந்தம் மட்டுமல்ல, அது தமிழகத்தின் சமூக மற்றும் அரசியல் கட்டமைப்பில் பிரதிநிதித்துவத்தையும் கூட்டு ஆளுமையையும் ஏற்படுத்துவதற்கான ஒரு நீண்ட காலப் பயணம் என்பதை விசிக தங்களது தொண்டர்களுக்குத் தெளிவுபடுத்தியுள்ளது.
