“நாங்கள் போர்க்களத்தில் இருக்கிறோம்; பேச்சுவார்த்தைகளை பாதிக்காது”!. டிரம்ப் கருத்து!

மத்திய கிழக்கில் போர் பதற்றம் உச்சமடைந்துள்ள நிலையில், அமெரிக்காவின் போர் விமானம் வீழ்த்தப்பட்டது குறித்து அதிபர் டொனால்டு டிரம்ப் முதல்முறையாக பகிரங்கமாகப் பேசியுள்ளார். சனிக்கிழமை இன்று செய்தியாளர்களை சந்தித்த அவர், அமெரிக்க போர் விமானம் அழிக்கப்பட்டதால் ஈரானுடனான ராஜதந்திர பேச்சுவார்த்தைகளில் எந்த பாதிப்பும் ஏற்படாது என்று கூறினார். “இல்லை, இதில் சமரசம் என்ற பேச்சுக்கே இடமில்லை. இது போர்; நாங்கள் இப்போது போர்க்களத்தில் இருக்கிறோம்,” என்று டிரம்ப் அதிரடியாகத் தெரிவித்தார். போர்ச் சூழல் நிலவினாலும், ஒருபுறம் ராணுவ நடவடிக்கைகளும் மறுபுறம் பேச்சுவார்த்தைகளும் தொடர்ந்து நடைபெறும் என்றார்.

ஈரானின் தஸ்னிம் (Tasnim) செய்தி நிறுவனத்தை மேற்கோள் காட்டி அல் ஜசீரா வெளியிட்டுள்ள தகவலின்படி, ஹார்முஸ் ஜலசந்தி அருகே அமெரிக்காவின் ஏ-10 (A-10) ரக போர் விமானத்தை ஈரான் சுட்டு வீழ்த்தியுள்ளது. தரை இலக்குகளையும் கவச வாகனங்களையும் அழிக்கும் திறன் கொண்ட இந்த ஏ-10 விமானம், ஈரானின் வான் பாதுகாப்பு அமைப்புகளால் குறிவைக்கப்பட்டதாகக் கூறப்படுகிறது. இதற்கிடையே, ஈரானில் வீழ்த்தப்பட்ட மற்றொரு எஃப்-15இ (F-15E) போர் விமானத்தில் இருந்த ஒரு வீரரை அமெரிக்கப் படைகள் வெற்றிகரமாக மீட்டுள்ளன. அந்த வீரர் தற்போது அமெரிக்கப் பாதுகாப்பில் மருத்துவ சிகிச்சை பெற்று வருவதாக சிஎன்என் தெரிவித்துள்ளது.

மீட்புப் பணிகள் குறித்துப் பேசிய டிரம்ப், “இந்த விவகாரத்தின் நுணுக்கமான தன்மையைக் கருதி எதையும் விரிவாகக் கூற முடியாது” என்று மறுத்துவிட்டார். மேலும், இந்தச் சிக்கலான ராணுவ நடவடிக்கைகள் குறித்து ஊடகங்கள் செய்திகளை வெளியிடும் விதம் திருப்திகரமாக இல்லை என்றும் அவர் தனது அதிருப்தியைத் தெரிவித்தார். எஃப்-15இ விமானத்தில் இருந்த இரண்டாவது வீரரின் நிலை என்ன என்பது இன்னும் உறுதி செய்யப்படாத நிலையில், அவரைத் தேடும் பணிகள் தீவிரமாக நடைபெற்று வருகின்றன. ஹார்முஸ் ஜலசந்தி பகுதியில் ஏற்பட்டுள்ள இந்த நேரடி மோதல், உலக நாடுகளிடையே பெரும் கவலையை ஏற்படுத்தியுள்ளது.