ஐபிஎல் 2026 கிரிக்கெட் தொடரின் முதலாவது தகுதிச் சுற்றுப் போட்டியில், நடப்பு சாம்பியன் ராயல் சேலஞ்சர்ஸ் பெங்களூரு (RCB) அணி, குஜராத் டைட்டன்ஸ் அணியை 92 ரன்கள் வித்தியாசத்தில் வீழ்த்தி அபார வெற்றி பெற்றது. இந்த வெற்றியின் மூலம் பெங்களூரு அணி இறுதிப் போட்டிக்குத் தகுதி பெற்றது.
இமாச்சலப்பிரதேசம் தர்மசாலாவில் நடைபெற்ற போட்டியில், டாஸ் வென்ற குஜராத் அணியின் கேப்டன் சுப்டன் கில், பந்து வீச்சை தேர்வு செய்தார். அதன்படி, முதலில் பேட்டிங் செய்த பெங்களூரு அணி, கேப்டன் பட்டிதாரின் அதிரடி ஆட்டத்தால் (33 பந்துகளில் 93 ரன்கள்; 9 சிக்ஸர்கள்) 20 ஓவர்களில் 5 விக்கெட் இழப்புக்கு 254 ரன்கள் எனும் இமாலய இலக்கை நிர்ணயித்தது.
கடினமான இலக்கை நோக்கி விளையாடிய குஜராத் அணி, பெங்களூருவின் துல்லியமான பந்துவீச்சை எதிர்கொள்ள முடியாமல் அடுத்தடுத்து விக்கெட்டுகளை இழந்தது. ஒரு கட்டத்தில் 88 ரன்களுக்கே 8 விக்கெட்டுகளை இழந்த அந்த அணி, இறுதியில் 162 ரன்களுக்கு அனைத்து விக்கெட்டுகளையும் இழந்தது.
பெங்களூரு அணியில், பட்டிதார் (93*), கிருணால் பாண்டியா (43), விராட் கோலி (43) ரன்கள் எடுத்தனர். பெங்களூரு தரப்பில் ஜேக்கப் டஃபி 3 விக்கெட்டுகளையும், புவனேஸ்வர் குமார், ராசிக் சலாம், கிருணால் பாண்டியா ஆகியோர் தலா 2 விக்கெட்டுகளையும் வீழ்த்தினர். குஜராத் தரப்பில் ராகுல் தெவாதியா மட்டும் அதிகபட்சமாக 68 ரன்களை எடுத்தார்.
இந்த வெற்றியின் மூலம் பெங்களூரு அணி இறுதிப் போட்டிக்கு முன்னேறியது. தோல்வியடைந்த குஜராத் அணி, இறுதிப் போட்டிக்கான வாய்ப்பைத் தக்க வைக்க 2வது தகுதிச் சுற்றுப் போட்டியில் உள்ளது.
