தமிழக சட்டமன்றத் தேர்தலில் 234 தொகுதிகளிலும் தனித்துப் போட்டியிடும் தமிழக வெற்றிக் கழகம், ஏற்கனவே தனது முழு வேட்பாளர் பட்டியலை வெளியிட்டுள்ளது. இந்நிலையில், அறிவிக்கப்பட்ட வேட்பாளர்களில் சிலருக்கு எதிராக அந்தந்த தொகுதித் தொண்டர்களிடையே அதிருப்தி நிலவுவதாலும், தொழில்நுட்ப ரீதியாக சில மாற்றங்கள் தேவைப்படுவதாலும், சுமார் 3 முதல் 5 தொகுதிகளில் வேட்பாளர்களை மாற்ற கட்சித் தலைவர் விஜய் முடிவு செய்துள்ளதாகத் தகவல்கள் வெளியாகியுள்ளன. இதற்கான அதிகாரப்பூர்வ அறிவிப்பு இன்று அல்லது நாளைக்குள் வெளியாகும் என எதிர்பார்க்கப்படுகிறது.
குறிப்பாக, மாற்றுக் கட்சிகளில் இருந்து விலகி தவெக-வில் இணைய ஆர்வம் காட்டும் ஒருசில முக்கியப் புள்ளிகளுக்கு வாய்ப்பு வழங்கும் நோக்கில் இந்த மாற்றம் இருக்கலாம் என அரசியல் வட்டாரத்தில் பேசப்படுகிறது. முதன்முறையாகத் தேர்தலைச் சந்திக்க உள்ள நிலையில், வலுவான வேட்பாளர்களைக் களம் இறக்க வேண்டும் என்பதில் விஜய் உறுதியாக உள்ளார். எனவே, கள நிலவரம் மற்றும் தகவல்களின் அடிப்படையில் இந்த இறுதிச் சீரமைப்புப் பணிகளை அவர் மேற்கொண்டு வருவதாகவும் கூறப்படுகிறது
இருப்பினும், ஏற்கனவே அறிவிக்கப்பட்ட வேட்பாளர்களை மாற்றினால் கட்சிக்குள் உட்கட்சிப் பூசல் அல்லது அதிருப்தி ஏற்பட வாய்ப்புள்ளதாக அரசியல் விமர்சகர்கள் எச்சரிக்கின்றனர். அதேசமயம், அனுபவம் வாய்ந்த மாற்றுக் கட்சியினர் தவெக-வில் இணைவது கட்சியின் பலத்தை அதிகரிக்கும் என்றும் ஒரு தரப்பினர் கருதுகின்றனர். நடிகர் விஜய், பெரம்பூர் மற்றும் திருச்சி கிழக்கு ஆகிய இரண்டு தொகுதிகளில் போட்டியிடும் நிலையில், இந்த வேட்பாளர் மாற்ற அறிவிப்பு தவெக தொண்டர்களிடையே பெரும் எதிர்பார்ப்பை ஏற்படுத்தியுள்ளது.
