தவெக தலைவரும், நடிகருமான விஜய்யின் முன்னாள் மேலாளரும் இயக்குநருமான பி.டி.செல்வகுமார், திமுக தலைவர் மு.க.ஸ்டாலின் முன்னிலையில் அக்கட்சியில் தன்னை இணைத்துக்கொண்டார்.
2026 தேர்தல் நெருங்கும் நிலையில், திமுக, அதிமுக உள்ளிட்ட கட்சிகள் மாற்றுக் கட்சியினரை தங்கள் கட்சிக்கு இழுத்து வருகின்றன. அந்தவகையில் தற்போது, விஜய்யின் நீண்ட நாள் நண்பராகவும், முன்னாள் மேலாளராகவும் இருந்த பி.டி. செல்வகுமார், திமுக தலைமை அலுவலகமான அண்ணா அறிவாலயத்தில் கழக தலைவர் மு.க.ஸ்டாலின் முன்னிலையில் அக்கட்சியில் தன்னை இணைத்துக்கொண்டார். அவருடன் சேர்த்து 100க்கும் மேற்பட்டோரும் திமுகவில் இணைந்தனர்.
விஜயின் கோயம்பத்துர் மாப்பிளை படத்தில் நடித்ததின் மூலம் நடிகராகவும் அறியப்பட்டவர் பி.டி.செல்வக்குமார். விஜய்யின் புலி படத்தை தயாரித்த செல்வகுமார், பந்தா பரமசிவம், ஒன்பதுல குரு ஆகிய படங்களை இயக்கியுள்ளார். வசீகரா, மதுர, போக்கிரி, வேல், சுறா, காவலன், ஆகிய படங்களுக்கு பி.ஆர்.ஓவாக பணியாற்றியுள்ளார். மேலும் இவர் கலப்பை மக்கள் இயக்கத்தை நடத்தி வந்தது குறிப்பிடத்தக்கது. நீண்ட காலமாக நண்பர்களாக இருந்த விஜய் – செல்வகுமாருக்கு இடையே மோதல் ஏற்பட்டதால் இருவரும் பிரிந்ததாக கூறப்பட்ட நிலையில் அவர் தற்போது திமுகவிலை இணைந்துள்ளது அரசியல் வட்டாரத்தில் பேசுப்பொருளாகியுள்ளது.
