தமிழ்நாட்டில் சட்டம், ஒழுங்கு முற்றிலும் சீர்குலைந்துள்ளதாகவும், பெண்கள் மற்றும் குழந்தைகளுக்கு எதிரான குற்றங்களைத் தடுக்க அரசு கடுமையான நடவடிக்கை எடுக்க வேண்டும் என்றும் தேசிய முற்போக்கு திராவிட கழகத்தின் (தேமுதிக) மாவட்டக் கழக செயலாளர்கள் கூட்டத்தில் வலியுறுத்தப்பட்டுள்ளது.
சென்னையில் நடைபெற்ற தேமுதிக மாவட்டக் கழக செயலாளர்களின் அவசர ஆலோசனைக் கூட்டத்தில், தமிழகத்தின் தற்போதைய சட்டம் ஒழுங்கு பிரச்சினை மற்றும் மின்வெட்டு உள்ளிட்ட பல்வேறு பிரச்சனைகள் தொடர்பாக 5 முக்கியத் தீர்மானங்கள் ஒருமனதாக நிறைவேற்றப்பட்டன.
சட்டம் ஒழுங்கை சீரமைக்கக் கோரிக்கை
தமிழ்நாட்டில் தற்போது சட்டம், ஒழுங்கு முற்றிலும் சீர்குலைந்து காணப்படுகிறது. இதனால் பொதுமக்களின் பாதுகாப்பற்ற நிலை நீடிக்கிறது. அரசு உடனடியாக சட்டம் ஒழுங்கை சீரமைத்து, பொதுமக்களின் பாதுகாப்பை உறுதி செய்ய வேண்டும். குறிப்பாக, பெண்கள் மற்றும் குழந்தைகளுக்கு எதிராக அதிகரித்து வரும் பாலியல் வன்கொடுமைகளை முற்றிலும் தடுக்க வேண்டும். இத்தகைய கொடூரக் குற்றங்களில் ஈடுபடும் குற்றவாளிகளுக்கு உச்சபட்ச தண்டனை கிடைக்கும் வகையில் கடுமையான சட்ட நடவடிக்கைகளை அரசு மேற்கொள்ள வேண்டும்.
முழுமையான பயிர் கடன் தள்ளுபடி
தமிழக அரசு தற்போது அறிவித்துள்ள பயிர் கடன் தள்ளுபடி திட்டம் அரைகுறையாகவும், முழுமையற்றதாகவும் உள்ளது. இதனால் இந்தத் திட்டத்தை விவசாயிகள் ஏற்றுக்கொள்ளவில்லை. எனவே, தேர்தல் வாக்குறுதியில் குறிப்பிட்டிருந்தபடி, விவசாயிகளின் பயிர் கடன்கள் அனைத்தையும் நிபந்தனையின்றி முழுமையாகத் தள்ளுபடி செய்ய அரசு தனது முடிவை மறுபரிசீலனை செய்து, உடனடியாக நடவடிக்கை எடுக்க வேண்டும்.
மின்வெட்டு பிரச்சினைக்கு நிரந்தரத் தீர்வு
தமிழகத்தில் அண்மைக்காலமாகத் தினந்தோறும் அறிவிக்கப்படாத மின்வெட்டு ஏற்பட்டு வருகிறது. இதனால் பொதுமக்களின் இயல்பு வாழ்க்கை, மாணவர்களின் கல்வி மற்றும் தொழில், வணிக நடவடிக்கைகள் பெரிதும் பாதிக்கப்பட்டு மக்கள் அதிருப்தியில் உள்ளனர். தமிழக அரசு இந்த மின்வெட்டுப் பிரச்சினைக்குத் தற்காலிகத் தீர்வு தேடாமல், நிரந்தரத் தீர்வு கண்டு தடையற்ற சீரான மின்விநியோகத்தை உறுதி செய்ய வேண்டும்.
மேகதாது அணை விவகாரம்
கர்நாடக அரசு மேகதாதுவில் அணை கட்டும் திட்டத்தை எக்காரணம் கொண்டும் அனுமதிக்கக் கூடாது; அத்திட்டத்தை அவர்கள் முழுமையாகக் கைவிட வேண்டும். இந்த விவகாரத்தில் மத்திய மற்றும் மாநில அரசுகள் தமிழகத்தை வஞ்சிக்காமல், நடுநிலையோடு செயல்பட்டு இரு மாநிலங்களுக்கு இடையே எவ்விதப் பிரச்சினையும் ஏற்படாத வண்ணம் உரிய ராஜதந்திர நடவடிக்கைகளை மேற்கொள்ள வேண்டும்.
டாஸ்மாக் கடைகளை மூடக் கோரிக்கை
பள்ளிகள், கல்லூரிகள் மற்றும் வழிபாட்டுத் தலங்களுக்கு அருகில் உள்ள 717 டாஸ்மாக் கடைகள் மூடப்படும் என்று தமிழக அரசு அறிவித்திருந்தது. ஆனால், அந்தப் பட்டியலில் உள்ள கடைகள் உண்மையில் மூடப்பட்டுவிட்டனவா அல்லது மூடப்பட்டதாகக் கணக்குக் காட்டிவிட்டு கள்ளச்சந்தையில் மது விற்பனை நடைபெறுகிறதா என்பதை அரசு தீவிரமாக ஆய்வு செய்ய வேண்டும். மேலும், பொதுமக்களின் நலனைக் கருத்தில் கொண்டு, தமிழகத்தில் உள்ள ஏனைய பல்லாயிரக்கணக்கான டாஸ்மாக் கடைகளையும் படிப்படியாக மூட அரசு உடனே நடவடிக்கை எடுக்க வேண்டும் என 5 தீர்மானங்கள் நிறைவேற்றப்பட்டன.
