தமிழகத்தில் உள்ள 234 சட்டசபை தொகுதிகளுக்கும் வரும் 2026 ஏப்ரல் மாதம் தேர்தல் நடைபெற உள்ளது. நடிகர் விஜய்யின் கட்சியான தமிழக வெற்றி கழகம் முதல் முறையாக சட்டசபை தேர்தலை சந்திக்க இருக்கிறது. முதல் தேர்தலிலேயே வெற்றிக்கனியை பறித்து விட வேண்டும் என்று அக்கட்சி ஆர்வம் காட்டி வருகிறது. சட்டசபை தேர்தலுக்கு சில மாதங்களே இருக்கும் நிலையில் தமிழக வெற்றிக் கழகம் தேர்தல் சின்னம் பெறுவதற்கான நடவடிக்கையில் ஈடுபட்டிருந்தது.
தேர்தல் கமிஷன் விதிகளின்படி பதிவு செய்துள்ள புதிய கட்சிகள் தேர்தலில் போட்டியிடுவதற்கு 5 முதல் 10 சின்னங்களை தாங்கள் விரும்பும் வகையில் குறிப்பிட்டு விண்ணப்பிக்க வேண்டும் என்று அவகாசம் அளித்திருந்தது. அதன்படி இந்தக் கட்சி ஆட்டோ, விசில், பேட், பூமி உருண்டை, மோதிரம் உள்ளிட்ட சில குறிப்பிட்ட சின்னங்களை ஒதுக்க கேட்டிருந்தது.
சமீபத்தில் ஆட்டோ சின்னதை கேரளாவில் உள்ள ஒரு கட்சிக்கு ஒதுக்கியதாகவும் தேர்தல் ஆணையம் தரப்பில் தெரிவிக்கப்பட்டது. இதேபோல் மோதிரம் சின்னம் ஒதுக்கப்பட்டுள்ளதாகவும் தகவல் வெளியானது. ஆனால் இதுகுறித்து இன்னும் அதிகாரப்பூர்வ அறிவிப்பு வெளியாகவில்லை.
இந்தநிலையில், தேர்தல் சின்னங்கள் (ஒதுக்கீடு மற்றும் பங்கீடு) ஆணை, 1968-இன் பத்தி 10B-இன் கீழ் பொதுச் சின்னம் கோரி தவெக அளித்த விண்ணப்பம் பரிசீலனையில் உள்ளது என்றும், உரிய நேரத்தில் தமிழ்நாடு மற்றும் கேரள சட்டமன்றத் தேர்தல்களுக்கு அந்த கட்சிக்கு ஒரு பொதுச் சின்னம் ஒதுக்கப்படும் என்றும் வட்டாரங்கள் தெரிவிக்கின்றன.
பத்தி 10B-இன் கீழ் பொதுச் சின்னம் பெறும் பதிவு செய்யப்பட்ட அங்கீகரிக்கப்படாத அரசியல் கட்சி, கடந்த மூன்று நிதியாண்டுகளுக்கான நன்கொடை அறிக்கை மற்றும் ஆண்டு தணிக்கை அறிக்கையைச் சமர்ப்பித்திருக்க வேண்டும் என்று விதிகள் கோரும் நிலையில், தவெக 2024-25 நிதியாண்டிற்கான நன்கொடை மற்றும் ஆண்டு தணிக்கை அறிக்கைகளை முறையாகத் தாக்கல் செய்துள்ளது என்றும் அந்த வட்டாரங்கள் மேலும் தெரிவிக்கின்றன.
இருப்பினும், எந்தவொரு பதிவு செய்யப்பட்ட அங்கீகரிக்கப்படாத அரசியல் கட்சிக்கும் வழக்கமாக நடப்பது போலவே, தேர்தல் அறிவிப்புக்குச் சற்று முன்னதாக தவெகவுக்கு ஒரு பொதுச் சின்னம் ஒதுக்கப்படும் என்று எதிர்பார்க்கப்படுகிறது.
